Bab XII. Mulak Manggoluh hun Hamateian

1. Lang Sadar Onom Ari Onom Borngin

Tarlobih mamungkah tahun 2002, huahapkon do penurunan ni kesehatanku. Ongga do bani bulan April 2002, iangkat inang ampa anaknami ahu ibagas na lang sadar be hu praktek ni Dr. Krisman Girsang. Anjaha ijai pe lang sadar lanjar isuruh opname. Irawat ma ahu i Rumah Sakit Umum dua minggu dokahni. Naboritku aima gulangku naik pakon prostat.

Tapi dob ai sehat tumang ma huahapkon. Lang dong be na hurang atap ija. Halani ai huulakkon ma use horja songon na somal. Hansa lambin huorui ma deba, lang be pala songon na salpu in. Anjaha dob ai sompat do ahu piga-piga hali age hu Jakarta ronsi hu Lampung manunsang niombah ampa pahompu ijai.

Iangkat Hun Rumah Lang Sadar Onom Ari
Dua tahun dob ai, bani bonani tahun 2004 on, huahapkon ma use dong penurunan ni kesehatanku. Termasuk ma ai kenaikan ni gula-darahku.

Halani ai age pe borhat ahu hu Jakarta tanggal 25 Juli ronsi 08 Agustus, manghadiri pamasu-masuon ni pahompungku si Dionisius hun Depok (humbani si Marhaposan Purba, na paduahon), lang be sehat tumang pangahapku. Anjaha husadari do ai. Halani marumur ma ahu jalan 89 tahun. Gari motor Chevrolet 1950, lang be adong na mardalan. Atap muridku sanggah i Haranggaol tahun 1936 lang piga be na manggoluh. Hape ahu jorgit ope tong ibahen.

Tapi age pe sonai, sai tong do marsora ibagas uhurhu maningon hubaritahon Jesus na tarsilang in. Lang tarpasip ahu sora ai. Halani ai ma bani Minggu 15 Agustus borhat ope ahu hu GKPS Tanoh Jawa. Rencanangku, salpu hun gareja torus ma hu Rumah Sakit Balimbingan, halani adong homa ijai pahompu boritan.

2. Keadaanhu i Rumah Sakit Nini Niobahku  >>