Markareta: Rumah Sakit, Penjara, Sermon ampa Hu Kuria-Kuria
Domu hubani keyakinanku songon na isobut i atas in ma mambahen age pe domma resmi pensiun ahu tahun 1986, tapi secara struktur do ai. Anggo ilobei ni Tuhan in, lang pag ahu pensiun, halani ibere ope ahu manggoluh anjaha ipasu-pasu. Halani ai maningon torus do ahu marhorja halani ampa untuk Tuhanku. In ma huahapkon dalanku mangidangi-Si ibagas hatuaonku, al.:
- Dua hali saminggu hu rumah sakit (RSU, RS.Tentera, RS Harapan) pakon hu rumah-rumah anggo dong tudu hutangar boritan atap na dob matua. I rumah sakit lang pitah pagori ni GKPS na hukunjungi ampa hutonggohon. Tapi age pagori kuria na legan, sipata age parugama Islam. Anjaha malas tumang do uhur ni sidea bani kehadirankin.
- Hu penjara, mangunjungi sidea na marsitaronon ijai. Hansa parpudian on hubatasi ma, halani lang sai tahan be ahu.
- Sermon, secara khusus ma ai i GKPS Jl. Sudirman Senen ampa GKPS Jl. Sisingamangaraja ari Jumat.
- Ari Minggu marambilan hu kuria khusus ni na i huta-huta.
Malas uhurhu halani ibere Naibata hubangku kesehatan ampa torang ni uhur. Halani age domma lobih umurhu 70 tahun, tapi boi ope ahu markareta (sepeda motor Honda Cup) ronsi hu Haranggaol.
Ipansiunkon Niombah Markareta
lbagas na lang pala huparuhurhon, hape torus do ipardiateihon niombahku na mardalani ai ahu markareta. Anjaha mabiar do sidea anggo mahua ahu idalan. Tarlobih tahun 1990, itangar sidea do piga-piga hali madabuh ahu, hansa lang pala mahua. Halani ai bani tahun 1993, ielek-elek ganup parumaen, boru ampa pahompu ma ase lang be markareta ahu. Isurduki sidea ma sipanganon laho manjalo kunsi ni kareta in. Anjaha ahu pe, lang pala borat uhurhu manjalo pangindoanni sidea ai.
Mamungkah hunjai mintor hupasoh ma mamakei kareta. Tapi lang mararti pensiun total ma ahu lang be mangidangi Tuhan. Markareta do pensiun. Tapi anggo naheihu lape pensiun ibahen Tuhan, halani sehat tumang ope ahu.
Domu hujin torus do aim mangidangi hu rumah Sakit ampa marrumah-rumah mangidah na boritan ampa na dong pergumulanni. Tapi mardalan nahei, naik beca atap naik oplet/bus ma.
Memang marhitei na sonin dong ma keterbatasan. Tapi olat ni na boi hubahen, torus do hudalankon. Sonai age Sermon ampa marambilan hu Kuria-kuria bani an Minggu.
Tapi bani bonani tahun 2004 on, dong ma huahap moruni kesehatanku. Anggo marambilan pe ari minggu, ra ma horahan ahu anjaha mangindo minum. Sonai sorangku gati ma lang be songon na salpu in. Matua ma tongon. Halani ai lang be sai dor au mandalankon horja in. Tapi anggo sehat do huahapkon, hudalankon do tong. Halani marutang do huahapkon ahu, anggo lang hubaritahon Jesus na tarsilang in hubani hasomanku joima.
Anjaha tarima kasih ma hubani Tuhan. Ronsi na husuratkon buku on lang ongga tompas atap madabuh ahu, anggo halani na mambaritahon Ambilan na Madear in do, songon na gati ihabiarhon niombahku. Tapi torsa anjaha sehat do tong ahu itaruhkon Tuhan in das hu rumahku.
Lanjar marhitei Buku on ma homa aima padaskon tarima kasih hubani Kuria atap pribadi, na mangidangi ahu marhitei teh, pnl, anggo ididah ma ahu songon na loja padaskon Hata in. Nini Tuhan Jesus : “Barang ise na mamberehon bah borgoh sasangkir gelah hubani sahalak na etek-etek on, halani susian-Ku ia, na sintong do hatang-Ku bennima, seng anjai magou upahni.” (Mateus 10:42).
Ase sahali nari tarima kasih banggal ma !
XII. Akhir Agustus – September 2004 Mulak Manggoluh hun Hamateian >>
Recent Comments