Bab XI. 1972 – 1985 Pandita Resort, Evanggelis Umum, Ronsi Pensiun

1. Tahun 1972 – 1978 Pandita Resort Siantar II

Marhitei na dob salosei ma Penterjemahan ni Bibel Padan Nabasia (PL) pakon penyempurnaan penterjemahan Padan Nabaru (PB) ronsi pengkoreksianni, pertengahan tahun 1972 itempatkon ma ahu gabe Pandita Resort Siantar II. Hansa anggo Surat Keputrusan pasal Pandita Penterjemah BibeI hot ope,lape icabut.

Panorang ai pitah 3 Resort ape GKPS i Siantar on. Siantar I, pamatangni GKPS Jl. Sudirman, Siantar II GKPS JL. Sisingamangaraja, pakon Resort Siantar III aima GKPS Jl. Asahan. Halani ai buei do Kuria na masuk ha Resort on,aima: GKPS Jl. Sisingamangaraja, Bah Kapul, Simbolon-Panei, Panombean Panel, Panombean Simalungun, Banuh Raya, Talun Kondot, Saribu Raya, Pusuk Pardamean, Sitinduk, Sordang Raya, Rami, Peniel, dob ai tambah ma use parpudi GKPS Desa Bane.

Domu hani buei ni Kuria in, gatinan halani mangidangi Sakramen ma parroh ni Pandita hujai. Halani ai legan ni Kuria na dohor-dohor, gatinan ma ahu borhat ari Sabtu, ase sompat bodarini marbuali, evangelisasi, atap manorih naboritan, atap partonggoan i Kuria ai. Dob ai ari Minggu sogod na sompatkon ma tongkin mangajari Sikolah Minggu. Salpu Kebaktian Minggu anggo adong pe na porlu sihorjahonon ari Senen ma use mulak.
Legan ni mangidangi sebagai Pandita Resort torus do ahu aktip rnangidangi hu Rumah sakit, sipata hu penjara.

Domma adong namin kenderaanku panorang ai, merk NSU. Tapi halani i kota atap dalan na agak rata hansa tahan, halani ai anggo hu Kuria na agak daoh gatinan ma ahu marlereng, paima huboli kereta (sepeda motor) Kijang tahun 1967 bekas.

Age pe sonai, malas tumang do uhurhu sadokah Pandita Resort on. Lanjar panorang ai ma najajagi mambagi Resort on kerjasama pakon Resort Siantar III (Jl. Asahan). Saud ma jongjong Resort Siantar IV. Hu Siantar IV ma ganup Kuria na mardalan hun Sinaksak, al. : Bah Sulung, Pargampualan. Lang piga tahun dob ai, dob gabe sada Kuria Sektor Desa Bane, igagasi hanami ma homa ase ibagi Resort on. Aima Resort Siantar V. Pamatang Resort ni aima GKPS Peniel, janah pagaranni ganup na hun sirpang Sibatu-batu ronsi Saribu Raya. Anjaha dob iresmihon Resort on, itempatkon ma use ahu gabe Pandita Evangelis Umum.

Anggo hudingati keadaan ampa pangidangion panorang ai, lang pitah mangkar ni mangan na maningon parsiaphonon, halani daoh-daoh ni sidalanon. Sipata mangkar do age modom anggo pala ma hu huta-huta. Halani parmasuk ni Evangelisasi atap parsahap-sahapan na ganjang bani bodari Sabtu pakon hasoman sahorja atap pagori bani Kuria na nitohu ai. Anjaha patarni Sakramen homa.
Tapi tang na mangkarni homa aima pasal parduiton. Halani, legan ni otik ope hansa, ai pe ra do lang sitor ronsi roh hu Kuria ai hanami sambil Sakramen. Marhitei na sonai, ra do lape na jalo belanja lopus piga-piga bulan.

Husobut in, halani layak ni Naibata do bennami, tarlobih hubangku. Age pe sonin keadaan in, tapi malas do tong uhurhu, sehat, margogoh; anjaha age pe gati hurangan, tong do sungkupan ibahen Naibata bani panorangni. Tarpuji ma goranNi!

2. Borhat hu Jerman  >>