Pasal on pe anggo humbani pingkiran ampa hamaloon ni jolma lang mungkin tarbahen ahu ampa inangnami. Pitah halani holong ni Tuhan do hansa na patorsahon niombah in haganupan. Halani anggo humbani hajolmaon, domma kompleks masalahni, al.:
a.Buei ni 12 halak. Tolu do naboru, ai pe sianggian do haganup. Leganni ai dalahi bueini 9 halak.
Sada humbani harosuh anjaha dihut homa mengarupi balanja aima martonun ulos, terutama ma ai pesanan-pesanan khusus
b. Humbani pakeion, sipatu,sipanganon, ulang tahun, uang sikolah, buku, pembagian horja i rumah-i juma, manjaga adekni, ronsi durung-durung (galangan), pnl, gatupan boi parohkon masalah, parsimbunton ronsi paringoran samah sidea.
c.Tambah homa masalah lingkungan. Anggo paima tahun 1961, aman ope lingkungan Jalan Bali. Tapi dob mamungkah ramei, ijon ma pajumpahan pakon parponopan ni buei no margoran senteng ni Siantar panorang ai. Ianan ni na minum bagod na hun Parluasan, Jl.Kartini Timbang Galung pakon sekitarni. Halani ai, pengaruh ni lingkungan bajan tumang do.
Hansa domu bani horjangku na buei, tugasku aima mamuhoi sidea sogod-sogod, mambobahon mangan ampa kebaktian pagi. Legan ni a i bani inangnami ma ganup, termasuk urusan sikolah, adat, pakean, sipanganon, pnl.
Domu bani keadaaan na isobut nongkan, pitah Tuhan mando pangajamanku. Halani ai sogod sidokahan pukul 04.30 puho ma au. Marorgan anjaha mandoding ma ahu dob ai martonggo. Piga-piga humbani dodingku sogod-sogod (buei marbahasa Toba ope ai) al.:
a) Puho ho o Tondingki (Doding Haleluya No. 284, Poltak ma sogod on)
b) Mata ni ari, Binsar sounari
c) Rapkon Tuhan Jesus in (Haleluya No. 160.)
d) Bai paruntolon pa sitaronon
e) Namadear Tumang Do (Haleluya No. 186)
f) Ai Dohor Tuhanta Unduk Bei ma Hita (Haleluya No. 265)
g) Ham Sipagoluh Au (Haleluya No. 149)
h) Na Mungkap do Surga (Haleluya No. 235)
i) Kumbaya My Lord Kumbaya (Bahasa Simalungun, bahasa Inggrisni)
j) Na legan, songon no dbb isobut bani halaman 83 hata-hatani nabuat humbani Haleluya No.107, tapi loguni Lob, Got 1.143 na idodingkon hanami pakon Pdd J. Depperman sanggah istirahat koreksi.
Doding in ma hubahen lanjar mamuhoi sidea haganup. Anjaha na so ra puho ope age domma pukul 05.00 tarpaksa ma hurohi. Dob ai marsitohu parlajaranni bei ampa horjani i rumah domu bani jadwal ni bei. Pukul 06.00 serapan pagi ampa kebaktian. Ningon ganup do in jojor mulai sikahanan ronsi sianggian.
Sonai age mangan bodari lang dong ai boi mangan parlobei atap parpudi. Halani dobsalpu mangan ningon ganup ma kebaktian anjaha margantih mambobahon tonggo. Anjaha pasal na mangan rap on disiplin tumang do hanami pakon Inang. Anggo tarlambat atap lang rup domu bani panorang na nob ituntuhon, lang boi itadingi kecuali domma parmisi. Dearan do bani pinahan (babui) siponganonni ai ase bani jolma na lang disiplin, Domma sonai aturanni. Salpu kebaktian pe ase marlajar bei use.
Khusus budari Sabtu, legan ma homa acarani. Sipata sipanganon pe anggo tudu dong dong, iistimewahon inangnami do attupni humbani na somal. Dob salpu mangan kebaktian akhir minggu. Panorang ai ambilanku pe hunganjang ma hubahen sekaligus podah. Dob ai margantihan ma mattonggo mamungkkah humbani sianggian. Hansa, ra atap na hurangku ma ai. Gati do bulinsah anak na dob garama anggo pala ma maganjangtu ahu marambilan, atap inangnami mambare podah. Hape nadob targanggu do sidea marmalam minggu. Halani pitah ai do hansa borngin na boi bebas bani sidea. Lanjar ijon ma hanami pasingatkon sidea pasal tugas-tugas mingguan ronsi parsikolah mingguan/parmingguan patarni.
Anggo tudu porlu ni horja i sabah Sibatu-batu, sipata ho juma isuruh inang iboan indahan ni sidea na lang kursus sore. ljai ma sidea mangan siang. Tapi age i juma maningon lobei istirahat/modom sore do tongkin. Ganupan on dalam rangka pasomal-somalhon sidea lanjar dalam mangindo bani Tuhan ase ulang tarihut-ihut bani lingkungan na hurang dear.
Tapi age pe sonai, lang mintor dear homa haganup. Adong do homa saat ni lang ibalosi podahta. Dab ni pe use ibalosi. Hansa gari sonin pe nabahen sompat do dong pergumulan halani perkembanganni. Samintolah ma anggo lang na bahen hinan atap na paturut tumang. Anjaha age pe lobei songon na lang itangihon hita, sai na mulak do in asal ma tongtong itonggohon hita.
Humbani ganup na isobut in sihol patugahkon sonaha Tuhan totap marhorja laho padearhon, mambahen sungkup, paluahkon, margogohi, mangapohi, mambaluti ronsi pamalumhon ganup goluhta. Anjaha intini: Lang dong na so tarhahen Naibata asal ma ihabujurhon hita manonggohon ampa mangkorjahon parentahni Tuhan. Dob ai itumpaki anjaha ibere do haganup bani panorangni.
Recent Comments