Tahun 1965 ilayak-layakkon Naibata ma use hubennami sada anak dalahi. Hansa humbani partubuhni hurang sehat do dakdanak on, anjaha torus do martambar. Anjaha bani sada borngin dob marumur hira-hira 3,5 bulan, sompong manomboh ma naboritni. Mangidah keadaanni anjaha tongah borngin ma homa, gabe hubahen ma pandidion tarolos hubani. Ibahen hanami ma goranni Eben Ezer Purba.
Dob tardidi anjaha martonggo hanami, tongkin songon na mubah do keadaanni. Anjaha girah sogod iboan hanami ma ia martambar. Tapi lang piga dokah dob itambari, mintor tinggi use panasni. Anjaha martonggo ma hanami. Lang piga dokah dob amen, ningku, marujung ma goluhni ipartambaran ai.
Sompat do horu uhurnami. Marriah ma ahu pakon inangnami. la ma mamboan rnulak hu rumah naik sadu. Ahu marlereng sambil patugahkon hubani anaknami hu sikolahni, sonai pakon hubani piga-piga keluarga na dohor ampa hasoman. Mintor marrohan do homa hasoman sahuta. Anjaha halani sogod ope na masa ai, iputuskon ma ase sadari ni ai gelah isuankon. Ihobasi sidea ma sagala na porlu. Deba patugahkon hubani keluarga na dohor na lang sompat ope hupatugah, deba mambahen batang, mangkurak iananni, pnl. Anjaha haganupan mintor beres do ibahen sidea.
Maruntol anjaha pusok tumang do uhurnami bani na masa in. On ope homa iahapkon hanami tilahaon. Hansa ibagas haganupan in marondos bani Tuhan in mando hanami. Halani ai age ibagas na masa ai, on ma dodingnami rup pakon haganup niombahnami ronsi na laho borhat hu panimbunan i Lorong XX Martoba. Aima:
Bai Paruntolon ‘Pa Sitaronon
Cipt : Giovanni Giacomo Gastoldi,1591
Lagu : A Lieta Vita/in Dir Ist Freude
Simalungun : Pdt.J. Deppermann & Pdt.Dj. Petrus Purba, 1958
Doding on ibahasa-simalungunkon Pdt. J. Deppermann pakon ahu tahun 1958 sanggah na marlajar bahasa Simalungun ia. Sangah koreksi Bibel hanami, on ma salah sada na gati idodingkon hanami (Kanon) tingki istirahat atap anggo buntu hanami bani sada-sada hal. Ampa sada nari humbani Lobt Gott 1,143, lirikni humbani Haleluya No. 107: “Irikkon nasiam ma au”.
Itongah-tongah ni pusok ni uhur in pe, sanggah na idodingkon hanami doding on, iahapkon hanami do sonaha doding na idodingkon ibagas haporsayaon mangapohi ampa mambere gogoh hubennami, tarlobih inangnami. Songon isi ni doding in, sonai ma iahapkon hanami kuasa ni Tuhan mambaluti ampa pamalumhon ugahnami. Lang pitah ugah in na ibaluti ampa ipamalum. Tapi lanjar ibere do gantih ni. Bani 23 Mei 1966, ilayak-layakkon Naibata ma use hubennami sada boru, on ma use niombahnami na pasapuluh duahon. Tardidi ma ia, ibahen hanami ma goran ni Blandina Tiarmalina Purba.
Recent Comments