4. Ekonomi: Naibata Totap Mambuka Dalan

4.1. Lang Tarpingkiri Dalan ni Jahowa 

Anggo humbani pingkiran ni jolma do, untuk mangannami na 14 halak gelah ganupan domma borat tumang. Tarlobih mamungkah tahun 1959 (dob panorang pemberontakan PRRI) ronsi pecahni G-30-S PKI, keadaan ni ekonomi susah tumang. Anjaha anggo ipadomu hubani padan sanggah pandidion, kewajiban ni orangtua do ningon pasikolahkon dakdanakni. Halani ai bani umur 7 tahun, maningon masuk Sikolah Rakyat (SR) atap Sekolah Dasar (SD) sidea.

Marpardomuan bani na pasikolahkon on, tahun 1957 sanggah na pindah pe hanami hun Jalan Nias hu Jalan Bali domma dong hamaholon in. Halani niombah sikahanan domma sikolah i SMP Kristen II i Jalan Lapangan Bola. Anjaha adek-adekni Sikolah Rakyat (SR) ope aima i SR GKPS Martoba.

Domu hubani na isobut i atas in, lang otik na maningon sipasir-siron tiap bulan. Anjaha anggo humbani belanja na hujalo ganup bulan do, anggo ietong-etong pitah uang sikolah ni dakdanak tumang gelah domma bois. Tapi bagei do dalan ni Naibata pasirsirhon anjaha mambahen torsa haganupan bani panorangni.

>> 4.2. Naibata Mambahen Pagar ni Ubag ampa Antinganou