Domu hubani na isobut i atas in, gok hapintaran anjaha pardear layak do Naibata. Halani bani partongahan ni tahun 1958, lape piga dokah dob marianan pangungsi i huta Pangungsian (desa Bane sonari), ipatuduhkon Abang Tatim Purba ma tanoh i Pondok Tengah sahektar. Dob ai roh homa na ilambungni, ijualhon ma sahektar nari. Aima ipudini Kantor Camat Siantar Martoba sonari. Murah tumang do argani panorang ai. Minton isuani hanami ma galuh sitabar. Halani dompak jai do homa Tempat Pembuangan Akhir (TPA) sampah ni kota panorang ai, iboli ma ai Rp. 20,- das bani Rp. 40 samotor truk. Marhiteihonni ai mombur-mombur ma pisang ai. Sayur, lasina mangka tubuh lang pala isuan. Lang tartaruhi be buah ni pisang on halani buei ampa banggal-banggalni. On ma lobei mangurupi sipanganonnami.
Paima jumpah panorang na borat tumang, sai adong do dalan na legan ibahen Tuhan. Mintor adong hansa tong na manawarhonsabahni sonai juma daratni, anjaha manobut ningon hanami do mamboli ai. Deba ronsi mangangsur pe lang mahua. Hape on ma ibahen Tuhan in ase bani panorang na borat lang pala haru hanami nasal sipanganon. Hal on tarlobih dob banggal-banggal ma ganup niombah in. Ra boi do ibayangkon hita 14 halak rap mangan bani sada meja makan, 10 halak ma ai dalahi 4 naboru. Sipata tambah ope anak Sikolah.
Tarlobih sanggah marsikolahi sidea na 12 halak on i Perguruan Tinggi, SMA, SMP ampa SD, lang otik halongangan na ibahen Naibata bennami. Sakaliling ni sabah nami ma do gagal panen halani hama: ubag atap antinganou, tapi sabahnami otik pe lang iguit. Songon na ipagar in ibahen batasni.
Hal on lang pitah bani sada ianan. Gabe hasaksian do on, anggo ihatahon Naibata ibagas buku Mali-aki : “Jadi tulakonti ma halani hanima sipangatah (balang) ai, ase ulang be isiapkon gogoh ni tanoh in …” (Mal 3:11).
Sintong-sintong boi do masa ai age bani jaman on. Halani ai lang ongga hanami mamboli boras. Bahkan na mangkorjahon juma ai pe marsiahu-ahu. Alasanni ase dihut gan sidea dapotan pasu-pasu in anjaha boi homa mangan.
Sonai do age tahun 1970 ampa bonani 1980-an. Ai ma sanggah piga-piga sidea sikolah i Perguruan Tinggi, legan ni ai tingkat SLTP amps SMU. Adong i Nommensen, i Duta Wacana, i UNPAD Bandung. STT Jakarta, pnl. Mamungkah ma cengkeh ni hasoman mangkaseda. Tapi panorang ai ma ramos buah ni cengkehnami piga-piga tahun. Nai age horja na ihorjahon ni inangnami martonun i rumah ipasu-pasu Naibata do. Age pe agak mahal hargani i banding hun tiga atap humbani pesanan na legan, tapi buei do tong na mamesan. Sipata ronsi 6 bulan nari pe ase iporluhon domma ipesan anjaha mintor ibere duitni. Janah gati tumang lang pitah nansa argani ai ibere. Ilobihi ope humbani argani na dob mahol ai. On pe nini uhurhu pitah halani Tuhan do na manggorahon ai.
Tapi adil tumang do homa Naibata. Ibotoh na porlu banta. Halani ai dob moru na sikolah, deba halani tammat ma ampa marhorja, moru ma homa ganup. Anggo musim hama monsi, antinganou, sonaha sakitarni sonai do homa jaloon nami. Matei cengkeh ni hasoman, bois ma homa cengkehnami. Ulos pe lang be dong be, halani lang tahan inangnami martonun, pnl
Anjaha husobuti haganupan in aima pitah gabe hasaksian sonaha Naibat a na manggoluh in marhorja do sadihari pe, laho patorsa-torsa halak na marhabiaran hu Bani. Anjaha ibagas ai ma homa huidah sonaha rusia ni Naibata manramotkon goluh ni jolma na marhaporusan hu-Bani:
- Lang anjai paturuton ni Naibata hurangan, asal ma ibahen dalanni.
- Lanjar songon na managan ind do homa ibahen. Age buei ijin sipanganon, tapi olat ni sungkup tarpangan janah bosur hita, ai do hansa na boi banta. Sai do ge pasalon. Anggo domma sungkup, domma bosur, lang be roh halongangan ai. Mulak ma songon na somal.
Sonai ma Naibata marhorja laho patorsa-torsa ampa mambere sagala na porlu ibagas goluhnami. Sipata songon namabalu na i huta Sarpat (1 Raja-raja 17:7-16), laho bois ma ninuhur, hape roh use, ronsi salosei haganupan na maningon sitanggung-jawabonnami. Hansa ibagas haganupan ai na porlu aima tonggo ampa mangorjahon anjaha haporsayaon bani tonggo ai.
Recent Comments