I. Legan ni haluahon humbani pamaraan, rasun, sabur-saburan na gati hualami ipardalanan, tapi patolu halihon on ma anggo na tangkas tumang huahapkon sonaha Naibata langsung turun tangan patuduhkon kuasa-Ni. Ai ma bani 1 Oktober 1965 (G.30.S PKI).
2. Humbani bonani tahun 1965, domma mangintei pangahap hubani sada keluarga na mambuka kodei i huta ai. Asal hujai niombah-nami belanja bujur tumang hansa keluarga on. Sipata langsung do itangar sidea bapa ai mangkatahon : “Mura-mura baen hamu tu anak ni Pandita i. Unang baen songon tu na asing i”, nini hubani inang i rumahni. Na botoh do ia komandan ni sada partai nadominan panorang ai, na dob ilarang Pamarentah. Hansa sai na ahapkon halani bujur ni do ai.
Sonai do homa bani bulan Juli /Agustus. Sanggah na mangkurak “Lubang L” domu hubani pengumuman ni pamarentah. Sompat do piga-piga hali isunsang, anjaha ipaingat age parbolagni.
3. Songon na dob isobut bani bagian sebelumni mamungkah tahun 1961 adong do Bibelstudi i rumah. Sada humbani Parhorja janah anggota Bibelstudi on bujur tumang. Hansa terlanjur masuk anjaha gabe na iparetongkon ma gatni bani organisasi na isobut i atas in. Hansa dob tarjadi ope na masa in, ase nabotoh. Hape domma dong dokumen daftar goran ni siboiskonon bani tanggal 30 September /1 Oktober 1965. Adong 20 halak, anja ha ahu/keluargangku ma na par lobei (nomer sada), dob ai Gr. Tokoh G. Damanik, St. Jakobus Sinaga, pnl.
4. Anjaha bani tanggal 3 Oktober, roh ma homa tutur adekku hun Jl. Sisingamangaraja. Age pe lang Parhorja ia, tapi aktif do Bibelstudi. Sambil mangaku salah tapi marmalas ni uhur ipatugah ma homa nini : “Aihh Abang, anggo mahua hinan nasiam, ahu ma na lepak. Lang tartaronkon ahu be salahku. Ai ihusipkon hasontanta ai do namin ase hupadas bani nasiam, ase mamungkah tanggal 30 September ulang i rumah on nasiam apala 3 borngin. Ai ma tonahni halani halani holongni bani nasiam. Atap sonaha ai hubalosi ia, ningku: ai tarkahua ma Abang ai ambia. Ise na pag manlarangsi use along marborngin i rumah ni?. Anjaha memang lang ongga pala hupadas ai hu bamu. Halani ai diatei tupa ma, lang mahua nasiam”, nini.
Memang natangar do piga-piga humbani na dob idaftar ai, adong do na sompat lang irumah, lumpat, halani dong gan husip.
5. Piga-piga dokah hunjin, roh ma homa hu rumah na padaskon sonaha na masa bani horngin na majangin ai, domu hubani rencana sidalankonon ni sidea na itugaskon hinan hu Jalan Bali (maksudni ianan nami tading). Pangakuan ni sidea nini :
“… sadalan hubani rencana martugas mangalop Pdt. Dj Petrus Purba aima petugas hun Parluasan. Hansa atap aha mambahen ai, agak tarlambat sidea. Dob ai piga-piga hali roh hanami hu rumah ni Pdt. Petrus. Tapi ididah hanami ma sesuatu. Lang boi hanami masuk. Mulak hanami tongkin. Iulakkon hanami use. Ijai ope homa ia. Aha pe lang tong tarbaen hanami. MuIak hanami. Sonai ma ronsi patoluhalihon. Ai ma mambahen tarlambat, siang ma ari, na ija pe lang use sompat.”
Memang borgin ni in bulinsah tumang do ahu pakon inang panorang ai. lbogei hanami do piga-piga torab dong na marsahapi i darat. Hansa torus hanami martonggo hubani Naibata. Dob pe patarni na botoh ma na dob tarjadi do na hebat tumang.
6. Hutaringati in, sihol manobut bahasa Naibata na manggoluh do Jahowa. Simada kuasa do la mangatasi sagala kuasa. Age sonaha rencana ampa usaha ni jolma laho mambahen na jahat ronsi marsura-sura sihol mamboiskon hosahta, anggo lang ibere atap isatujui Tuhan, aha pe lang na boi bahenonni atap aha pe in, Songon hinatahon ni Hata in do: “Jahowa do marporang mangkopkop nasiam, anjaha siplah nasiam” (2 Musa 14:14). Nini Tuhan Jesus “Tapi sada jambulan pe lang bulih magou humbani ulu nima.” (Lukas 21:18); “anggo ahu pakon hasomanku sarumah, Jahowa do sibalosannami” (Josua 24:15).
Recent Comments