2. Pasu-Pasu Parniombahon

Borat tumang do horjangku bani periode 1958 — 1972 on. Lang pitah binahenni loja ampa borat ni na menterjemahkon Bibel ampa keadaan ni fasilitas panorang ai. Tapi age tekanan-tekanan na sipata huahap lang be ibagas dalanni. Hal ai tarlobih ibagas proses penyelesaian koreksi terakhir ni Bibel in.

Tapi itongah-tongah ni ganup na borat in, lanjar ibere Naibata do tongtong idop ni uhur ampa malas ni uhur hubennami sekeluarga. Piga-piga hunjai, bani tanggal 04 Juli 1959, ilayak-layakkon Naibata ma use hubennami niombah pasiahkon. Anjaha on ma born na per-tama. Malas tumang uhurnami bani sibere-bere ni Tuhan in. Anjaha tardidi ma ia. Ibahen hanami ma goran ni : Perpetua Lestiorina Purba.

Sonai bani tanggal 19 Pebruari 1961. Ilayak-layakkon Naibata ma use anak pasapuluhkon. Tardidi ma homa ia, janah ibahen hanami ma goran ni Polikarpus Purba.

Bani tahun 1964, ibere Naibata do homa hubennami malas ni uhur banggal. Aima niombahnami sikahanan (si Marhaposan) lulus hun SMA Negeri I/B Pematang Siantar janah ijalo hu ITB (Institut Teknologi Bandung) marhitei test saringan na panorang ai iadongkon i daerah termasuk i Medan. Lang ibotoh hanami na dihut ia test hu Medan. Tapi nai ma pangatur ni Tuhan. Halani ninuhurnami hinan i Sumatera Utara on ma ia kuliah, anjaha dihut do test i Fakultas Kedokteran USU, tapi lang lulus.

Tapi ijon ma gati dalan ni Naibata na lang ididah jolma. Halani bani tahun sebelumni sanggah Kalas dua, sompat do ia songon na maruntol tongkin halani maningon mangulang. Termasuk do on halani sadokah Kalas I, mardalan do ia hun Jl. Bali hu Jl. Parsoburan. Ipindo mamboli sepeda lang dong berehonon. Dob ai mulak hun sikolah anggo sanggah porlu horja i juma, maningon isoppatkon ope hu juma i Sibatu-batu, gabe hurang ma panorang marlajar borngin. Dob pe Kalas tolu “ibebaskon” lang be hu juma. Anjaha marhitei na sabar ia mangulang, janah ipasu-pasu Tuhan, gabe jumpahsi do sura-surani uhurni, lulus ia hun SMA I dengan angka baik. Aima homa gakni ase mintor barani ia hu Medan mangikuti test in, janah monang homa.

Bani ari Rabu, tanggal 18 Desember 1963, ilayak-layakkon Naibata ma use bennami sada boru, aima niombah pasapuluh-sadahon. Tardidi ma ia anjaha ibahen hanami ma goran ni Lydia Tiodorlina Purba.

>> 3. Tilahaon, Tuhan Mambaluti ampa Pamalumhon