Age pe loja, maruntol goluhku sadokah horja menterjemahkon Bibel in, tapi lang habilangan ampa hasuhatan pasu-pasu na ibahen Naibata hubennami sekeluarga. Piga-piga hunjai :
1. Maluah Humbani Keracunan Sipanganon
Tahun 1959, pitah 3 tangga ope hanami padohor-dohor rumah bani ianan on, anjaha halak Jawa do na dua keluarga in, haduasi humpit siamun ni rumah nami. Aima Keluarga Pak Karto ampa Wak Lubis. Tapi age palegan bangsa ampa ugama hanami domma somal ai marsitohuan, marsipiringan age sipanganon. Lang pitah panorang Lebaran atap Tahun Baru. Tapi age ari-ari biasa pe.
Bani na sadari tahun 1962, pagi-pagi roh ma inang sinrumah ni Pak Karto manaruhkon sayur ampa dawan, na tubuh dohor harang ni lombuni. Paima on pe domma gati ibere ampa ipangan hanami na sonai. Halani ai tanpa ragu-ragu mintor ilompah inangnami ma ai.
Domma homa ihasomalhon hanami humbani mungkahni na so boi ope mangan anggo lang riap mangan (sogod, arian ampa bodari). Hansa halani dokah mulak hun sikolah sikahanan sonai anak sinomor dua janah bulinsah ma adek-adek ni loheian, ilobei hanami ma mangan. Lang sadiha namin buei ni dawan ai. Hansa ganup dapotan otik bei.
Tapi lang piga dokah dob salpu mangan, ganup ma mutah-utah, mamulos boltokni anjaha lemas. Parlobei ma ai inangnami. Mangindahi tambar ope na sada, lape jumpah tambar ai domma mutah. Sonai ma hanami haganup, leganni sikahanan, si nomor dua, si nomor 4 (i Purbasaribu) pakon sietekan, halani lape mangan ope. Diatei do adong na montas. Mintor laho ma ia hu Kantor Kehutanan manelephon hu Rumah Sakit Umum. Anjaha lang piga dokah mintor roh ma motor (ambulan). Iangkat ma hanami (8 halak) anjaha iopname. Hansa marsiparahi. Dong pitah saborngin hansa boi ma mulak. Sidokahan aima inangnami, halani ia domma sompat parah.
Pasal on pe ipaluah Tuhan do hanami ganup, marhitei na podas roh pangurupion.
Biar tumang do Pak Karto on ronsi ganup keluarga ni. Halani ai torus do ijaga sidea hanami i Rumah Sakit Umum. Tapi mintor iyakinhon hanami do sidea na lang mahua hanami age sada. Anjaha ibotoh hanami do sidea pe lang sangaja ai. Halani ai dob malum ganupan, roh ma sidea use hu rumah. Anjaha dear tumang do torus hubungannami ronsi na pindah sidea hun huta ai.
Recent Comments