I Sipalipali (Tiga Baru) Marmuat Kopi

la hasomannami na mangungsi hun Pangambatan, deba borhat ma hu Huta Usang, i Juma Simbora, Halebaran, Sipalipali, Sumbul, Sidikalang. Deba totap i Sibabi. Ganup marsitohu tinanda ni bei. Halani ibotoh hanami i Sipalipali adong do ijai keluarga ai ma si Gunung Purba par Haranggaol. Hujai ma hanarni borhat. Lanjar ijai ma hanami 3,5 bulan dokahni.

Tapi das do pangkorhon ni na masa in age hu huta on. Boras pe mahol buaton. Sementara duit pe lang be adong. Halani ai, dakdanak na dua in ma na usahahon lobei mangan indahan. Anggo hanami, gatinan ma mangan gadung tubuh-tubuh tumang. Aima na itorihi hun parkopian ni parhuta ai.

I Pangambatan buei ope omei namin, aima na ibere ni anak Sikolah. Halani lang dong be dahanon, ongga do hubaranihon mulak hu Pangambatan mangalop omei, pala dong dahanon bani dakdanak gelah, sambil mangidah keadaan i huta ai. Huboan ma piga-piga kaling, lanjar hu duda i Pancur Batu. Adong do dua kaling boras na hu duda ai. Huboan ma ai hu Sipalipali manlopusi Dolog Sibuaton na idalani hanami piga-piga bulan na salpu.

Laho mangurupi belanja na porlu bani dakdanak, sipata laho ma ahu mangihutkon partiga-tiga hu Sidikalang. Ijai hurupi ma marmuat kopi. Ibere sidea ma duit otik hubangku. Ai ma hubolihon bani na porlu untuk dakdanak.

Boritan Sompong Anak Nomor Dua

Bani na sadari, sanggah na mulak ahu mangubur sada halak na marujung goluh manompong i huta ai, das ahu i rurnah mintor tarhatos ma anaknami sinomor dua aima si Agustin Purba. Anggo panorang ai nini parhuta ai, na idorab begu ganjang do ai songon na baru husuankon ai.

Hanami pe sosak tumang ma. Inangnami pe itangisi ma anaknanami in. Tapi huhatahon ma ase martonggo hanami. Anjaha on ma hupindohon hubani Naibata: “… bahen hamuliaon ni Goran-Mu Jesus, ase ibotoh anjaha ihaporsayai sidea gogoh ni kuasa-Mu, halani ai pamalum Ham ma anaknami on”. Lang piga dokah mintor mulai ma marhosah use anaknami in. Malas tumang uhurnami, anjaha longang parhuta in. Sidea pe lambin porsaya ma bani kuasa ni Jesus. Anjaha marhitei kuasa ampa gogoh humbani Jesus, age pe sonai borat ni na masa in, torsa anjaha sehat do hanami sadokah ipangungsian. Lanjar sanggah i pangungsian on ma buei panorangku laho marlajar bahasa Inggris.

Mulak hun Pangungsian

Bani bulan Maret 1948, na tangar ma domma agak aman keadaan. Halani ai naputuskon ma mulak. Tapi palobei hun Mariah Purbasaribu ma. Hunjai ma ningon ase hu Pangambatan.

Halani ai borhat ma hanami mardalan nahei hun Sipalipali hu Sumbul. Ijai ma hanami dua borngin. Hunjai itoruskon hanami ma mardalan turun dompak Silalahi. Halani loja tumang ma, marbomgin ma hanami ijai saborngin. Patarni, girah sogod hupindahi ma parsolu mamboan hanami hu Nagori. Tapi solu etek-etek hansa adong. Ai pe mintor tambah homa na mangihut. Gabe ponjot anjaha narus-narus manongnong ma solu on halani doras ni tao Silalahi. Tapi tarima kasih ma bani Tuhan, horas do hanami ibahen.

Das i Nagori adong ma na padas barita ase ulang itoruskon hanami hu Haranggaol. Halani buei do ijai pejuang marsinjata laho mamorang halak Bolanda atap dong roh hun Silalahi. Dob isungkuni hanami ise tentera Pejuang ai, ipatugah sidea ma hun Purba, termasuk botou ni inangnami aima si Johani Saragih Simarmata.

Tapi halani lang tartarongkon be torik ni hun pangungsian ai, roh ma inangnami nini ma: “Toruskon hita ma gelah. Anggo maningon matei ma hape, anggo botou diri do na manembaki, uhumi ma hujin.”
Halani ai iputuskon hanami ma borhat. Ielek-elek hanami ma sahalak simada solu ase itaruhkon hanami hu Haranggaol.

Halani biar ni inangnami manangar barita pasal Pejuang in, itongah ni Tao ibuangkon inangnami ma duit Bolanda na isimpanni songon tabungan. Hape i Haranggaol domma adong na padas barita bahasa Lae ni si Johani Saragih aima si Jadima Purba do hanami. Halani ai mintor ialo-alo ma hanami. Lanjar itaruhkon sidea ma hu huta Mariah Purbasaribu. Ijai ma hanami piga-piga borngin paulak gogoh ampa sihol bani na si Inang ampa Saninangku.

Gadni halani marhujai-hujon do Pejuang on, gabe mintor das do homa barita hubani Pandita Resort i Saribu Dolok, na dob i Purbasaribu hanami. Anjaha lang piga ari dob ai, roh ma homa suruhan paboahon: “Lang pala be mulak nasiam hu Pangambatan. Domma torsa ijai horjamu ibahen St. Mateus Simanjorang. Gabe guru i Saribu Dolok ma ham”. Nini Pandita Resort marhitei suruhan ai.

Lambin malas tumang ma uhurnami. Tarpuji ma Tuhan. Lanjar misir ma hanami hu Tigarunggu pasombuh sihol hubani na si Tulang Jatinggi Saragih ampa Anturang. Ijai ma hanami piga-piga borngin paima borhat mamungkah tugas na baru gabe guru i Saribudolok.

April 1948, Gabe Guru i Seribudolok >>