2. April 1948: Gabe Guru i Saribu Dolok

(Pagawai Pamarentah) Lanjar Voorganger

Lang ongga tarpingkir ahu na lao gabe guru i Saribudolok. Tarlobih ma sadokah i pangungsian ampa pardalanan mulak. Das gelah i Purbasaribu ibagas na sehat, lang hasuhatan be idop ni uhur ampa holong ni Naibata hubennami. Hape lobih hunjin do ipasirsir Naibata. Lang pitah das anjaha sehat pajumpah pakon ganup hinaholongan. Tapi na tangar homa torsa tumang horja ni Tuhan i Pangambatan ibahen juak-juak-Ni na baru aima St. Mateus Simanjorang. Lobih ni ai use, ihaporsayahon Tuhan homa horja na baru anjaha na lobih banggal bangku. Aima gabe guru i Saribudolok.

Ase tarpuji ma Tuhanta. Halani sintong tumang do hata-Ni na mangkatahon: “Tapi tarbahen-Si do lobih humbani na pinindonta barang na piningkiranta, domu hubani hagogohon na marhorja ibagas hita” (Epesus 3:20).

Halani ai, dob piga piga bomgin i Tigarunggu, bona ni bulan April mintor borhat ma hanami hu Saribudolok. Domu do ai bani surat na dob ikaluarhon Kantor Pusat HKBP sanggah ipangungsian ope hanami, na dob ipindahkon ahu anjaha na mangajari manggatihon au hu Pangambatan pe domma ibahen.

Sadalan hujin, lang pala singgah be hanami hu Pangambatan, halani mintor martugas ma ahu domu hubani surat in i Saribudolok. Aima gabe guru kalas VI i Sikolah (Pegawai Pemerintah RI) lanjar Voorganger i HKBP Saribu Dolok. Malas tumang uhurhu manjalo horja on.

Panorang ai manontuhon tumang do bani karier ni sada halak anggo boi buei lulus ujian negara niajaranni. Marhitei na iondoskon bangku kalas VI in, huahap gabe ujian do homa in bani diringku. Halani ai humbani bois ni gogohku, hupala-palai ma sonaha mangajari sidea ase pintar-pintar haganup. Age pe marhiteihon ni ai sompat do ihatahon halak ahu guru na paling disiplin anjaha koras, tapi tarbukti do hasil ni. Murid kalas VI na huajari panorang ai lulus haganupan. Lanjar sonai do age bani tahun berikutni.

Marhitei na dob i Saribudolok hanami, buei ma homa orangtua hun Pangambatan, Haranggaol, Nagori ronsi Sihalpe na mangindohon ase i rumahta kost niombah ni sidea. Deba hunjai aima Pdt. Dr. Armensius Munthe, Antanim Purba, pnl.
Hansa halani tarbatas do siat i rumah ai, pitah 21 halak hansa na boi tarjalo hanami. ljai ma sidea masak sandiri. Anjaha songon i parsikolahan, i rumah pe huajari ma sidea age pasal hata ni Naibata. Deba bahasa Inggris. Anjaha malas do uhur ni sidea age pe sipata disiplin tumang do hanami bani sidea.

Sadalan hubani surat penugasanku, isampingni Guru i Sikolah, lanjar ahu do homa gabe Voorganger i HKBP Saribu Dolok. Selaku Voorganger tugasni mulai humbani pahata giring-giring tiap sogod ampa bod ari, ari Minggu, anggo dong na marujung-goluh, na hudarat ni kuria. Sonai mangajari Parguru Manaksihon, manohu hu rumah ni pagori, mangajari koor ampa pasirsirhon sagala na porlu untuk kebaktian. Domu hujin, lang dong panorangku na kosong.

Anjaha age pe loja tumang do pangahap, tapi ipargogohi Tuhan in do ahu sonai hanami haganupan. Janah age pe sonai buei ni horja, sompat do homa hubagi tingkingku laho pabagaskon bahasa Inggrisku na dob hupungkah-pungkah hun Pamatang Raya nari.

 >> Dilo-dilo Gabe Calon Sikolah Pandita i Pamatang Raya