Legan ni pasu-pasu ni Tuhan hubani Kuriani, sonai do homa sagala na porlu ban i goluhnami ari-ari, ganupan sungkup do ibahen. Anjaha bani tanggal 02 September 1948, ilayak-layakkon Naibata ma use hubennami anak patoluhon. Tardidi ma ia anjaha ibahen hanami ma goranni: David Septianus. Sehat tumang do dakdanak in sonai hanami haganupan.
Iahapkon hanami do sonaha torus panumpakion ni Tuhan hubennami, tarlobih ma hubangku sandiri. Halani ai lang tarbahen ahu lang mamongkutkon horja-Ni, baik i parsikolahan sonai age i Kuria-Ni. Anjaha tiap tahun do murid kalas VI hun Sikolah Saribu Dolok tinggi tumang persentasini na lulus ujian negara.
Lang hubotoh atap halani aima ase bani bulan Juli 1950, roh ma surat hubangku na mangindohon ase dihut ahu gabe calon Sikolah Pandita na sihol iadongkon HKBPS i Pamatang Raya, na ipungkah bani bulan September 1950.
Domu hubani dilo-dilo in, malas tumang uhurnami. Age pe anggo hun segi ekonomi, anggo huihutkon in agak hunborat ma use goluhnami. Tapi lang pala sangsi hanami pasal ai. Halani ai ibalosi hanami ma dilo-dilo in.
Anjaha paima borhat hanami hu Pamatang Raya, bani 08 Agustus 1950 ilayak-layakkon Naibata ma use bennami anak paompatkon. Tardidi ma ia i HKBP Saribu Dolok anjaha ibahen hanami ma goranni Eduard Hamonangan
Minggu parpudi bulan Agustus 1950, mamuhun ma hanami hun HKBP Saribudolok laho mandihuti Sikolah Pandita i Pamatang Raya. Patarni lanjar borhat ma hanami.
>>VII. 1950-55: Sikolah Pandita i Pamatang Raya, Gabe Pandita Resort i Merek Raya
Recent Comments