Bab VII. 1950 – 55: Sikolah Pandita i Pamatang Raya, Gabe Pandita Resort i Merek Raya

Sikolah Pandita i Pamatang Raya

Sadalan hubani surat hun Kantor Pusat HKBP na manodoh ahu dihut Sikolah Pandita i Pamatang Raya, hutadingkon ma haguruonku. Halani ai pitah 3 tahun do hansa sompat ahu gabe guru Pegawai Pamarentah RI. Hun Saribudolok borhat ma hanami hu Tiga Runggu, rumah ni nasi Tulang. Ijai ma lobei keluarga paima adong rumah na totap i Pamatang Raya.

Bonani bulan September 1950, ipungkah ma Pendidikan. Lananni aima i HKBP Pamatang Raya (GKPS Pamatang Raya sonari). Pitu halak hanami guru na mandihuti Sikolah Pandita on, aima:

  • Gr. Williamer Saragih,
  • Gr. Bonarsius Saragih,
  • Gr. Dj.Petrus Purba,
  • Gr. Frederik Damanik,
  • Gr. Dj.Marinus Girsang,
  • Gr. Mailarn Purba, pakon
  • Gr. Samuel Purba.

Untuk sementara marianan bani sada rumah do hanami haganupan, paima adong rumah sisewaon. Lanjar ijai do ipasirsir sipanganonnami. Sonai ma lobei ibagas na sabulan.

Bani bulan Oktober, adong ma piga piga rumah sisewaon. Sada hunjai aima ianannami dua tangga: Gr. Bonarsius Saragih pakon ahu sandiri. Halani na dob adong rumah in, boi ma idilo hanami keluarganami bei. Inangnami pakon haompatsi dakdanak nami pe, Marhaposan, Agustin, David pakon Eduard, pindah ma hu Pamatang Raya.

Hansa songon parjanjian pakon Ephorus HKBP, halani gajinami lang be mardalan humbani Pamarentah atap Zending, halani ai balanja nami sadokah sikolah, pagori HKBP na i Simalungun ma pasirsirhon. Bueini tiap bulan itotapkon: sakaleng untuk dewasa anjaha 1,5 kaleng untuk keluarga/niombah. On ma na igugui pagori ni Kuria (HKBP) na i Simalungun marhitei na marrumah-rumah. Untuk mamboli attupni ibere Kantor Pusat HKBP ma Rp. 40.- tiap bulan.

Domu hujin, anggo bani mungkahni borat do pangahap. Halani niombah sikahanan pe domma sikolah. Tapi layak tumang do Naibata. Bagei do dalan ibahen laho mansungkupi haporluannami. Itongahtongah ni keadaan in, buei do mangindo hubani inangnami ase ikait sal, baju panas sonai ronsi na pajaitkon pakeian. Marhitei ai gabe sungkup do tong ganupan ibahen Naibata. Lang adong na hurang.

Anggo sikolah humbani pukul 08.00 – 13.00 do hanami. Halani ai bani panorang na lowong hupakei ma ai laho pabagaskon Bahasa Inggrisku. Lanjar hupungkah-pungkah ma homa mamparlajari bahasa Jerman.

Padua tahunkon dob i Pamatang Raya mandihuti Sikolah Pandita, bani tanggal 17 Juli 1952, ilayak-layakkon Naibata ma use bennami anak palimahon. Lanjar i HKBP Pamatang Raya do ia tardidi. lbahen hanami ma goranni si Christianus Purba.

 >> Manjalo Tohonan Pandita