Tuhan Mambere Hasoman Sahagoluhan

Holong ni Tuhan Hansa Na Padomuhon

Longang do uhurhu. Sanggah i Pamatang Raya, otik pe lang adong pingkiranku laho marrumah tangga. Hape anggo humbani keadaan ampa kesempatan ronsi keuangan pe, daoh ma adongan janah dearan panorang ai. Laho manunsang hu Dologmaraja pe daoh ma dohoran ase hun Pangambatan. Pitah 10 batu (km) do hansa hun Pamatang Raya hu Tigarunggu. Hun Tigarunggu, piga-piga kilometer nari mando ai hubagas dompak dalan Simarjarunjung. Hansa otik pe lang dong uhurhu dompak jai.

Hape sanggah i Pangambatan on, sonin ma borat ni keadaan ampa hamaholon, sipata untuk mangannami ampa adekku si Leman pe gati maruntol. Pakeian baru bois ipangan apui. Gaji lang ikirim hun Pearaja. Ancaman humbani datu lape aman. Justru bani keadaan na sonin ma tubuh sihol ni uhurhu marrumah tangga, ase adong hasomanku sahagoluhan. Hasoman laho mangidangi mangkorjahon horjani Tuhan.

Halani ai, anggo humbani pingkiran ni jolma, sonaha ma boru ra sungkunon atap simada boru mambere anggo sonin ma keadaan. Tontu urah hansa alasan manulak atap manunda lobei, paima aman otik keadaan. Hape itongah tongah ni ganupan in, mintor buha do homa uhumi boru ai sonai keluarga.

Borhat Manungkun Boru, Marujung Goluh Bapa

Anggo inangnami on, domma dokah manandai ahu. Aima sanggah Sikolah Guru ahu i Pematangsiantar, anjaha sidea Sikolah Mesis. Keluargakku pe domma itandai anak boru on, halani gati do ia hu Haranggaol hu rumah ni kakakni, Marulianna Saragih, sinrumah ni Tuan Haranggaol, Jatas Purba Siboro.

Halani ai lang pala longang uhur anggo anak boru tarlobih hasomanku kost sanggah sikolah ahu i HIS sipata ra ma sidea mansahap sahapkon in. Anjaha bapa pe domma tangkas itandai inangnami on, halani gati do age parmotor mangkatahon hubani “Idah andai parumaenmai pan Djadima”, nini sidea.

Domu bani keadaankin, bani ujung ni tahun 1942, hu suruh ma bapa ampa inang hu Dologmaraja, manjumpahkon keluarga, tulang Jatinggi Saragih ampa anturang ai Dorma br. Purba. Aima orangtua ni Pdt. A.Wilmar Saragih. Mintor dear tumang do parsahapan. Pitah sada do ipangindohon sidea bani bapa na ipadas Pdt. A. Wilmar Saragih. Aima ase ipaubah bapa parlahouni.

Bulan Pebruari,dua bulan dobmulak hun Dologmaraja, marujung goluh ma Bapa. Aha na gabe ipusokkon uhur ni Inang sonai ganup hanami sadokahni on, in do homa bonsir ni parmateini. Aima duitni na buei ai gabe sai ra sumsam parlahouni. On do homa na ipasingat ni age Pdt A. Wilmar ase ipaubah. Hape sai tong ihorjahon.

Borat turnang do namin na masa in, tarlobih bani hasaparion. Bagei ma hata ulpukan sitangaron. lpadomu domu ma pakon boru na sihol alopon. Deba manobut boru panunda, pnl. Tapi anggo hanami lang be porsaya bani ganup ulpukan in. Halani ai lang piga dokah dob na masa in, mintor laho ma hanami pakon Inang hu Dolog Maraja, lanjar mansahapkon horja pamasu-masuon.

>>Minggu 25 April 1943: Ipasu Pasu Marhajabuan