Dob lobih hurang satahun 2 bulan gabe Guru i Parnatang Raya, bulan Oktober 1940 roh ma Surat hun Kantor Pusat HKBP Pearaja Tarutung manempatkon ahu gabe Guru hu Pangarnbatan. Ai ma manggantihkon Gr. Jenus Purba Siboro.
Dob hupatugah bani bapa i Mariah Purbasaribu, borat do namin uhurni manlopas. Halani ibotoh sidea do sonaha keadaan ronsi buei ni ancaman i huta ai. Tapi halani ididah porlu ni uhurhu, gabe ihatahon ma adekku sianggian, Leman Purba hasomanku.
Anjaha bulan Nopember borhat ma hanami hu Pangambatan. Domma adong ijai rurnah Zending, aima i kompleks garej a sonari. Hansa harangan ope sekitarni tingki ai. Ijai ma hanami na dua marianan.
Domma namin hundokah ipungkah horja Zending ampa parsikolahan i huta on. Tapi mahol tumang ope sidea manjalo Ambilan na Madear in. Sonai do homa dakdanak, mahol tumang ope arahkonon ase ra marsikolah. Sipata naalopi ma hu rumahni barang hu juma. Mintor sirsir do sidea panorang ai. Tapi patar ni lang roh be.
Anggo na didah namin malas ni uhur ampa hapongkuton ni dakdanak in i parsikolahan, gabe longang do uhur. Halani anggo na didah patarni, sabagian banggal lang be roh ai. Anjaha anggo na sungkun pe namatorasni, balos ni sidea : “Lang namin hu juma gurunami. Tapi arusi ham ma! ” lbagas na mangarahkon sidea manjalo barita haluahon humbani Jesus pe, lang pala mahol sidea togu toguon. Ronsi hasirsiron ni sidea manadingkon goluh hasaparion. Hansa na longang uhur, asal mamontas borngin (golap ni ari), patarni salpu anjaha songon na lang ongga be ganup na ijalo ampa niakuhon ni sidea ai. Mangidah keadaan in, secara umum urah anjaha marosuh tumang do parhuta Pangambatan togu-toguon manjalo Ambilan na Madear in. Hansa gati (mungkin) halani biar ampa ancaman humbani guru/datu, gabe mundur anjaha lang be roh sidea. On ma kuasa na parah mamparjabolon ampa mambayangkon (mamasung) sidea bani ganup goluhni.
Lang pitah bani sidea tumang ancaman in. Age hubangku gati do isuba-suba padorapkon na binotohohni ai. Tujuan ni lang na ija-ija. Pitah ase ulang hubaritahon do hansa Ambilan na Madear in. Ulang huarahkon sidea hubani haluahon na sintong aima humbani Jesus. Ulang marsikolah age dakdanak ni sidea, pnl. Lang halani sogam ni uhur ni sidea mangidah ahu.
Tapi ibere Naibata do tong torang ni uhur hubangku. lbahen do tonduyhu ase tong puho janah totap bani pangkasomanion-Ni, anjaha sadar bahasa untuk horja in do ahu idilo janah isuruh hu Pangambatan. Aima ase maluah sidea ibahen Jesus humbani sangkut-sangkut ni pajabolonan ai. Halani ai ma ase lang ongga lang malas uhurhu sadokah i Pangambatan. Lang mabiar ahu anjaha lang ongga tarpasoh ahu mambaritahon Jesus Sipaluah in bani sidea. Maningon togu-toguonku do dakdanak, ase marpambotoh marhitei parsikolahan.
Domu hujin ma, humbani ganup na tarbahen ahu, torus do hu parpala-palai sonaha ase ganup dakdanak marsikolah namin. Anjaha ganup sidea dihut maluah humbani parjabolonan ni hagolapan ampa biar na mamasung sidea sadokah ni on. Janah ibagas haganupan ai, porsaya do ahu bani kuasa ni Jesus: age datu ai pe bani sada panorang maningon manowod do ilobebi ni Jesus, bahen hamuliaon-Ni.
Recent Comments