Marindahan Jagul Ampa Pakeian Guni!

Kehadiran ni tentera Jepang lang pitah marpangkorhon bani na marianan ipinggir dalan banggal tumang. Dihut do age bani huta na ibagas-bagas, termasuk Pangambatan. Hal on talobih i bidang ekonomi. Halani buei dalahi na idilo gabe Heiho, mangkorhon juma pe buei ma na lang be ihorjahon. Gabe buei ma keluarga lang be maromei, janah tarpaksa marindahan-jagul.

Tapi lobeinan do Guru-guru Zending termasuk ahu sandiri mangalami pangkorhonni keadaan in. Halani mamungkah masuk ope Jepang hu Tarutung, belanja hun Kantor Pusat HKBP lang be mardalan. Pitah piga-piga tumba boras tumang mando ijalo hanami tiap bulan. Halani ai anggo adong ope indahan-jagul panganon domma lumayan panorang ai. Sipata suhat atap gadung ma ipahamot, aima na ipangindo hun juma ni par Pangambatan.

Secara khusus na hualami, legan ni masalah sipanganon, sompat do paruntolon banggal bangku age parhiouon. Domu do ai sanggah matutung rumahnami, pitah pakeian na ipakei modom mando tading. Sementara marhitei penjajahan Jepang, age pe adong duit, tapi kaen sibolion pe lang adong. Hansa on pe lang mambahen moru malas ni uhurhu. Halani tukang roti do bapa, buei do i rumahni guni topung roti. In ma ialop hanami hun Haranggaol anjaha ipajaitkon. Ai ma lobei napakeihon.

lbagas haganupan in, na hubotoh pitah kuasa ni Jesus hansa na marhorja ibagas diringku ase mampu mandompakkon ganup keadaan ai. Sonai na marhorja ibagas uhur ni par Pangambatan mambahen sada pe lang adong na manulak anggo ipindo hanami suhat atap gadung hun jumani. In ma mambahen age lang roh be gaji, lang ongga hanami lang mangan.

Soal mangan gadung, suhat atap indahan-jagul, tapi mangan ma. Sibanggalan aima lang ongga moru malas ni uhurhu. Lang boritan. Halani ai lang ongga targanggu pangidangionku. Tuhan tongtong mambere gogoh ampa dalan hubangku.

 >>Tuhan Mambere Hasoman Sahagoluhan