Horja “Panabarion”, Datu Gabe Tardidi

Bani bonani tahun 1944, roh ma tonah ni guru huta ase iadongkon “panabarion”. Lang hubotoh tangkas atap halani na tambah in do na ra manjalo Ambilan na Madear tarlobih na maposo, sonai dakdanak na marsikolah pe lambin buei, gabe iadongkon horja panabarion i huta ai.

Memang horja na somal do panabarion bani hasipajuh begu-beguon.

Paima in pe domma ongga hudidah sonai inang nami, homa na sonin. Halani ai lang pala sai tarsonggot uhurnami.

Hansa na mambahen sungkun-sungkun janah songon na targanggu pangahap, halani datu ampa ganup na manabari manggantih hata hatani panabarion ai. Somalni, naborit, atap setan, atap aha pe na ipindohon “misir/muli” marhitei panabarion ai, hubani sada ianan do ihatabon misir. Lang hubani jolma. Tapi on, itukar sidea ase hubennami. Hubani Parki (Parugama Kristen).

Tangkas do hudingat na masa ai. Piga piga ari paima horja ai, itingtingkon guru/datu ma ase ganup pangisi ni huta Pangambatan mangadongkon hoja “Panabarion” mangusir bala na roh hu huta ai. Domu hujin itingtingkon datu ma:

  • Haganupan rumah ase ibahen ma inggot “bonang manalu”(bonang merah, putih ampa sibirong) ampa lambei gorsing.
  • Ilobei ni rumah ni bei ipasirsir horsik ampa kaling-kaling na boi marsora anggo iantuki.

Ganupan ma manlaksanahon tugah-tugah ni Datu/Guru in.

Hansa anggo hanami pos tumang do uhumami bani kuasa ni Jesus. Lang hubotoh atap halani biar atap halani holong ni uhur ni namaposo Parguru Doding ai bennami. Anggo sidea lang adong na ra mangihatkon acara in. Tapi i rumah do sidea haganup tumpu.

Saud ma ilaksanahon acara “Panabarion” in domu hubani panorang na dob itontuhon datu. Ganupan domma sirsir. Piga piga humbani acara in na ididah anjaha tangkas itangar hanami:

  • Bod ari, martumpu ma 7 halak datu. Dob ipasirsir sidea sagala na porlu marbaris ma datu na 7 ai mardalan manginggoti huta ai piga piga hali.
  • Bodarini sompong ma itangar hanami sorani kaling-kaling atap botol botol ampa lantei, dingding ni rumahni iantuki. Ai ma na isobut sidea “mamburbari”. Deba manampaki horsik na dob tumpu ilobei rumah ni sambil marsurak surak:
Tanduk ni bedu, butar-butar
muli ma begu-begu,
hu ruma guru pakon hu ruma ni Parki

Marsisungkunan ma hanami, mase sonai hata-hata ni ai? Sonaha do somalni? Dong ma namaposo ai patugahkon: “Somalni hu sampuran do ai isuruh muli”. Tapi lang hujai be isuruh guru huta ai. Hu rumah on do!”, nini.

Age pe sonai keadaan ai, pos tumang do uhumami bani kuasa ni Jesus. Sonang do hanami haganupan modom sabornginni ai. Anjaha lang adong na isoroh begu atap na mahua-mahua.

Sabalikni, patarni, na tangar ma barita marujung goluh niombah ni datu huta ai. Pusok tumang do uhumami manangar ai. Tapi lanjar ijin ma ididah hanami kuasa ni Jesus do na marhorja manjagai hanami.

Anjaha lang piga dokah dob na masa ai, sirsir ma age datu on manjalo Ambilan na Madear. Anjaha saud ma ia tardidi.

 >>Ilayak-layakkon Naibata Anak Sikahanan