“HamuliaonMu do na Huhasiholi, ale Jahowa”.
Hata ni Naibata bani ayat Manaksihonku do in tahun 1936 i HKBP Bregenstroth, humbani I Musa 49: 18 : “HamuliaonMi do na Huhasiholi, ale Jahowa”. Tapi lanjar on do hubahen judul ni Buku on. Halani in ma na hujolom, huhaporsayai anjaha huahapkon :
In ma balos jawaban ni Naibata hubangku bani pergumulan ni goluhku sadokah 8 tahun pasal surga atap naraka.
Lanjar Hata in do homa na mammotifasi, manogu‑nogu, mampargogohi, paluahkon ampa mangapohi ahu mamungkah sikolah, gabe guru, gabe pandita pakon bani ganup pangidangion ampa goluhku das hubani na boritan ampa lao marujung goluhku, ronsi anggo marujung pe goluhku, sadihari nini Naibata.
Lanjar in do homa motifasingku manuratkon buku na etek‑etek on. Lang untuk hamuliaonku, tapi andohar ganup ginomparhu, hasomanku juak‑juak ni Naibata khususni i GKPS, ganup halak Simalungun ronsi jolma i dunia on, ase Hamuliaon ni Jahowa ma ihasiholi. Dob ai tambahkononNi ma sagala na porlu bani (Mateus.6:33).
Pag ahu manobut ampa manaksihon sonai, halani domma hu alami sonaha cara ampa kuasa ni Jahowa mandilo ampa manogu‑nogu ahu humbani hasipajuh begu‑beguon nari das hubani na gabe guru, gabe pandita ampa mangidangi-Si lobih hurang 68 tahun: Jesus do simada Kuasa, Hasintongan ampa Hagoluhan. Hu‑Bani do hansa Hamuliaon anjaha ibagas Ia do hansajumpah hita Hamuliaon.
Ronsi sonari hudingat anjaha huahapkon do ai torus, Hamuliaon ampa kuasa ni Hata-Ni do na mandilo anjaha mammotivasi ahu mamutusko: “mangirikkon Jesus” atap tong “sipajuh begu‑begu” songon ugama ni bapa, inang, ganup keluargangku ronsi Simalungun umumni panorang ai.
Marbingkas do ai humbani barita na ipadas ni Guru Iskandar Simajuntak hubennami sanggah marsikolah i Tiga Langgiung tahun 1928. Aima pasal halak na bayak ampa si Lazarus na masombuh (Lukas 16:19-31). Anjaha domu bani barita in, bani ujung ni pangajaranni, Guru on manungkunhon hubennami: “Ise marosuh hu surga”. Spontan ahu pakon ganup hasomanku martuduh. Isungkun use: “Ise marosuh hu naraka”. Lang adong na martuduh!
Tapi sungkun-sungkun ai lang sibar ijin. Nini ma use: “Sonaha ma boi hanima hu surga, tardidi pe lang ra hanima?”
Ganupan sip. “Halani ihatahon Tuhan Jesus do”, nini manguduti, “pitah halak na porsaya anjaha lardidi hu bagas goran ni Naibata Bapa pakon Anak ni Tuhan Jesus Kristus ampa Tonduy Napansing, pitah ai do na boi hu surga.”
Manangar in pusok tumang ma uhurhu. Sihol tumang uhurhu hu surga. Lang hu naraka. Tapi lape tardidi ahu. Anjaba mahol do in. Halani Bapa, Inang, Saninangku, sada pe lape na tardidi atap gabe parugama Kristen. On ma na dokah gabe pergumulan ibagas diringku.
Ualuh tahun bergumul. In ma goluhku. Dob pe tahun 1936 marhitei gogoh na humbani Tuhan, huputuskon ma ibagas diringku. Age pe lang satuju orangtuangku, sonai ganup keluargangku, tapi ahu, ningon tardidi. Halani siholan abu ase hu Surga. Sonai do nini Tuhan Jesus. Halani ai tanpa orangtua, tanpa hasoman humbani keluarga, Tardidi lanjar Manaksihon Haporsayaon ma ahu. Anjaha I Musa 49 : 18 in ma iondoskon Naibata hubangku marhitei juakjuak-Ni : “HamuliaonMi do na huhasiholi, ale Jahowa.”
Dokah do ahu maruntol pasal Hata in. Domma tardidi ahu. Hansa sihol ni uhurhu hu surga ai, lambin marsora janah gara ibagas goluhku. Tapi lanjar sihol ni uhur in ma mambobai ahu mangarusi Hata in: “HamuliaonMi do na huhasiholi, ale Jahowa “. Surga aima hasonangan, ianan Hamuliaon ni Naibata. Na siholan hu Surga, maningon mamindahi anjaha manggoluh untuk Hamuliaon ni Naibata, ase manggoluh ia ibagas Hamuliaon-Ni Naibata i dunia on ronsi das hu Nagori atas (Surga).
Lanjar pangarusion na sederhana in ma mambahen tubuh bangku sihol ni uhur mangidangi Jesus. In ma mamotifasi ahu gabe Guru. Lang sibar ijin tumang. Tuhan marrencana lobih ope. Ipuhoi use uhurhu ase hutadingkon haguruonku. Masuk ma hu Sikolah Pandita tahun 1950. Lanjar mamungkah tahun 1952 gabe Pandita ma ahu i Simalungun.
Ahu sihol hu surga. Anjaha hamuliaonMu do na huhasiholi, ale Jahowa. Gabe gogoh, apoh apoh ampa kompas do in bani haganup goluh ni halak na sintong-sintong siholan hu surga. In ma na huahapkon ampa hualami ibagas haganup goluhku, horjangku ampa pangidangionku. In ma mambahen ija ampa huja pe ahu, barita pasal Surga in ionjar ningon padasonku hubani ganup halak, tarlobih ma i Simalungun. Ase ganup dihut hu surga.
Ahu sihol hu surga. Anjaha hamuliaonMu do na huhasiholi, ale Jahowa. Lanjar sihol ni uhur in do homa manggoki uhurhu age ibagas na matua ma ahu. Sonai age ibagas na boritan parah. Lanjar in do homa na huhaporsayai mambahen manggoluh use ahu anjaha boi use hususun buku on. Andohar marhitei na mambasa Buku on, lambin buei na siholan hu Surga anjaha mamindahi hamuliaon ni Jahowa tumang, age bani jaman modern on.
Halani ai, “ahu sihol hu Surga”. Anjaha hamuliaonMu do na huhasiholi, ale Jahowa. Lanjar in do tonahku hubani haganup ginomparhu ampa ganup hasomanku. Surga, rap pakon Jesus. Hamuliaon ni Jahowa. In ma tujuanta haganup.
Pematangsiantar, Oktober 2004
Humbangku na manuratkon Buku on
Pdt. Jadima Petrus Purba
Recent Comments