Age pe domma marpesta banggal patampei goranku, tapi ganupan ai lape boi mambebaskon bapa pakon inang humbani bayang-bayang na ialami sidea bani parujung goluh ni na ompat iatasku. Haganup haguruon, habotohon ampa acara na ibahen sidea bangku lang boi patotapkon uhur ni sidea. Memang sonai do anggo hun dunia on do ianan pangindoan ampa sipatotap uhur.
Biar ni sidea on taridah do ai age ronsi na godang ahu. Salah sada hunjai aima, na so ra janah ihaporluhon sidea manuratkon sadihari partubuhku atap patugahkon ai bangku. Lang pitah arini. Bulan ni pe lang.
Domu do ai (nini) bani podah ampa haporsayaon ni sidea sapari. Lang porlu pala padingat-dingaton ari partubuhni. Ase marmalu tonduyni manggoluh. Halani ai lang pala porlu patugahon. Sungkup ma pitah “purba” ni tumang. Hunjin taridah anggo bapa pakon inang torus ope sangsi na lao mangihut do ahu podas songon na ompat halak iataskai.
Sadalan hujin sanggah na masuk ahu sikolah i Haranggaol (3 tahun), torus ma lanjut hu Schakel School i Pamatangsiantar, Sikolah Guru hu Pematangsiantar/Sipoholon, ronsi marujung goluh ni bapa ampa inang, lang ongga ra sidea patugahkon panorang partubuhku. Tahun ni pe lang. Halani ai, sanggah na masuk ahu Guru, hupasungkun sungkun ma na matua i huta bulan partubuhku.
Domu hujin ma hubahen partubuhku bulan Januari. Anjaha dob Pandita ahu, hubahen ma tanggal 1 Januari ase urah dingaton.
Tapi langpitah bani tanggal ampa bulanni in maruntol. Dihut do homa tahunni. Mardomu ma sanggah mamungkah sikolah pe na ijia, lang iporluhon in. Pokok ni banggal. Boi idungdung tangan siamun hun simanjujung das hu pinggol siabilou.
Halani ai, sanggah na laho gabe Pandita ahu tahun 1952, hu taksir-taksir ma umurhu. Tanpa pikir panjang hubahen tubuh tahun 1920.
Hansa dob piga-piga dokah ahu gabe Pandita, sanggah marsaran, ra do tarpingkir ahu pasal umurhin. Hubilang-bilangi ari-ari ni goluhku. Huetong-etong pambahenan ni Tuhan hubangku. Antara lain:
Paima Pandita ahu tahun 1952, 16 tahun ma dab gabe Guru. Aima tahun 1936 mangajari kalas IV i Haranggaol. Tapi Ianjar hudingati, huetong-etong. Anggo tahun 1920 tubuh, mungkin do marumur 16 tahun domma mangajari (guru) ahu?
Anjaha anggo pajumpah ahu pakon bokas muridku i Haranggaol. Deba umur ni sidea dos pakon umurhu. Halani sidea nini tubuh tahun 1919. Deba tahun 1920. Halani ai lang mungkin nini sidea anggo ahu tubuh tahun 1920. Lang mungkin umurhu dos pakon sidea. Nini sidea, silanganni marbeda 4 — 6 tahun. Deba humbani bokas muridku na manobut in, aima:
- St. Attain Damanik (muridku i Haranggaol). Mungkahni lang porsaya ahu anggo umumi iatas ni 80 tahun. Tapi huidah ma sanggah parujung goluhni tahun 2003, marumur ma ia 84 tahun.
- St. Dj.M. Saragih (Guru hun Sihalpe, muridku i Haranggaol). Aima namatoras ni Pdt. Kitaman Saragih. la pe manobut lang mungkin saumur ia pakon ahu. Anjaha sanggah ujung ni goluhni tahun 2004. marumur ma ia 86 tahun. Pakon na legan ope.
Ahu pe lang yakin, sanggah na gabe guru ahu tahun 1936, pitah 16 tahun ope umurhu. Hansa domma sompat sonai. Anjaha sipata on ma hubahen kesimpulanku: age lang hubotoh pastini, tapi anggo Naibata ibotoh do in. Janah ganup ari-ari, bulan ampa tahun na laho salpu do humbani goluhku. Hansa manurut taksiranku pe parpudian on, lang mungkin marumur 6 tahun ahu mamungkah sikolah tahun 1926. Halani domma banggal ahu panorang ai.
Sonai homa panorang gabe guru, silanganni domma marumur 20 tahun ahu panorang ai.
Halani ai husimpulhon ma parpudian on, tahun partubuhku silanganni tahun 1916. Mararti do ai, 88 tahun ma umurhu sanggah husuratkon buku on. Tarpuji ma Tuhan na mambere umur na ganjang in bangku. Janah anggo na lepak tumang ma ahu mambahen tahun partubuhku sanggah na laho gabe Pandita ahu tahun 1952, on pe tarpuji ma Tuhan. Gabe rusia ni Tuhan do in bangku. Halani ibagas haotoon ai, gabe pasu-pasu do ai use, halani boi au lambin dokah mangidangi-Si paima pensiun.
Recent Comments