Tahun 1916, tubuhan tuah ma use inang Larnmainim br. Saragih. Aima anak palimahon. Dalahi. Sompat do lang pala ihamalaskon uhur sidea partubuh ni dakdanak on. Domu do ai bani pangalaman ni sidea na salpu. Halani ai gabe maruntol do sidea bani partubuh ni dakdanak on: antigan ma homa matei dakdanak in, songon na ornpat ilobei ni. Tarlobih ma bapa. Sompat do songon na lang pala parduli. Mabiar ia, na laho tilahaon ma use. Gadni tambah ma halani masam ni hata sibogeionni humbani saninani i jabu Tinggir, hasoman ni sahuta ronsi humbani hasomanni partiga-tiga.
Hansa itongah itongah-tongah ni pergumulan ai, bani sada panorang marpangidahan do bapa Jaidarn pasal anak in. Nini, ididah ma “purba” ni dakdanak in aima “na lihar, panondang”. Tubuh ma pangarapan bani. Sonon ma habotohon ampa haporsayaon sapari.
Domu hubani pangidahan in, gadni ipasungkun do age pandapot ni na marpambotoh. Gabe dos ma riah ni sidea ase ibahen ma pesta patampei goran ni dakdanak in lanjar mambahen pagar ni huta. Marpesta banggal ma sahuta Mariah Purba Saribu i rumah Tinggir. Bani acara patampei goran ai, ipadas ma pangindoan lanjar isungkun ma na mabuei ai, ise goran ni dakdanak in bahenon. Anjaha ganup ma na roh marsurak: DJADIMA….DJADIMA …..DJADIMA.
Lanjar aima homa ibahen ganup na roh ai gabe goran ni dakdanak in. Mararti do goran ai “Jadilah”. Ulang songon na salpu-salpu in be. Santorap on jadi ma. Si Djadima na manuratkon buku on ma anak palimahon na isobut i atas in.
Sonai ma barita in. Tapi selaku na dob porsaya hita bani Jesus, lang halani pesta ampa goran in ase jadi, manggoluh ahu songon na adong ronsi sonari. Lang homa halani purbangku na isobut sidea ai domu hubani habotohon, pemahaman ampa ugama ni sidea sisapari ai. Tapi pitah halani holong ni Tuhan do. Ipaturut Tuhan ahu manggoluh. Janah lang pitah ahu. Mangihut do age adek-adekku, anjaha manggompari do haganup:
a. Biden Purba (dob tardidi Archimedes Purba, mangalop boru hun Silumbak marianan i Medan. Ibere do homa bani sidea niombah 10 halak. dua dalahi, ualuh boru.
b. Tamapuang br. Purba (dob tardidi, Emelianna br. Purba). Marrumah tangga pakon Mayor Kav. Joseph Sinaga. Marianan i Medan. On pe ibere do ginompar 8 halak: 3 dalahi, 5 boru.
c. Nonah br. Purba (tardidi, Rusti br Purba). Marrumah tangga pakon Lorman Haloho. Marianan i Mariah Purba Saribu. On pe ibere do homa ginompar 4 halak : 3 dalahi 1 boru.
d. Samin Purba (tardidi : Leman Purba). Marhajabuan pakon Bibelvrow Ester br. Saragih hun Tiga Runggu. Hubani sidea pe ibere do homa ginompar sahalak dalahi.
Humbani na isobut i atas in, anggo paima hujalo Jesus janah tardidi ahu, lang adong na margoran si Petrus Purba. Na adong aima si Djadima Purba. Anjaha ai do itanda halak ahu i tongahtongah ni keluargangku, i huta ronsi i parsikolahan hinan pe.
Recent Comments