Anggo nadidah canggih ni jaman panorang on ibandingkon sanggah menterjernahkon Bibel in ahu, sipata ra do tarpingkir ahu:
- Ambit songon sonari canggih ni, adong komputer sanggah mangalimhon Bibel in ahu mamungkah tahun 1958, ra do lang pala sonai dokahni ampa lojangku mangkorjahon in, sonai age si Kantur Purba pakon hasomanni mangetik ganup naskah in.
- Huidah listrik, ambit sonon ma praktis ampa siangni age borngin, ra do lang sonai pala dokahni ampa torikni mangkorjahon in, ronsi parsedani matangku ibagas na 10 tahun in.
- Huidah canggihni alat komunikasi transportasi: ambit sonon na ijia ra lang pala ningon mardalan nahei atap marlereng ahu hun Jl. Bali hu Nomemensen manjumpahkon Dr Walter Lempp manungkunhon/mandiskusihon sada istilah na agak mahol. Ra boi ma pitah hutelephone. Atap manjumpahkon Pdt. J. Deppermann, Pdt. Ch.D. Tappembeck hu Jl. Simanuk manuk sadokah koreksi pnl.
Husobut in, gabe huidah homa sonaha pasu pasu ampa gogoh na ibere Naibata hubangku mardapot-dapot. Halani age pe sonin keadaan panorang ai, maningon tulis tanganonku haganupan, lang adong pangurupi atap sekretaris, tapi boi salosei haganupan.
Lang pitah ai. Na hotob mambahen borat ampa loja, aima anggo jumpah ma na salah hape sompat na suratkon, ningon gantihon ma ai. Halani lang mungkin na marcoret coret berehonon hu Kantor Pusat. Na hebatni domma sompat na tuliskon sada bagian. Hape dong sada istilah panorang ai sonai ma pangarusionni anjaha na suratkon. Lanjar sonai ma homa pangarusionni bani ayat selanjutni. Jumpah sada panorang, adong pengertian na lobih topat. Halani tanggung jawab baik secara iman ampa tugas, na gantih ma ganup lembaran ai marhitei na manulis-ulang na markaitan bani istilah nongkan.
Gati do homa salah anjaha loja use halani bois anginni lampu gas (petromaks), gabe sompat mirlop. Hape tudu sanggah marpingkir anjaha mamungkah jumpah artini. Maningon mintor na suratkon ma namin, ulang sompat lupa. Naoloskon, hape lang sompat, matei ma lampu! Tarlobih anggo domma itongah ni halaman, lang pitah na salah ai gantihon. Tapi ningon gantihon anjaha salinon use na sahalaman ai.
Anggo domma sompat na suratkon sipata lumayan ope. Sipata anggo tudu istilah na mahol, domma dapot artini, tapi mampar atap lupa use halani padearhon lampu lobei. Ra do homa sompong dong serangga masuk hun kasa ni lampu anggo tudu adong posah. Itampar sumbu (kaus) ni lampu ai anjaha maturtur.
Lang pitah halani lampu mambahen salah ampa loja use manalin. Tapi halani loja majajari manulis. Tudu buka tumang pingkiran, gabe na tekadkon ase salosei lobei na sabagian ai. Halani ai antara pingkiran ampa kondisi ni jari jari lang be sadalan. Ra ma bajan tulisan. On pe ra ma homa na gantih use. Anjaha ibagas haganupan on ulang dong pangahapta adong ibere biaya pamboli minak atap manggantih lampu gas sadokah sqpuluh tahun ai, songon sonari, adong biaya rekening listrik. Lang dong ai. Halani sonai ma keadaan panorang ai.
Atap halani dong sada istilah bahasa lbrani na agak mahol tumang. Halani ai na usahahon ma mandiskusihon hubani Dr. Walter Lempp hu Nommensen. Sipata tarpaksa ma mardalan nahei atap marlereng, halani podasan ma ai ase paima oplet. Halani kareta songon na bani gambar i atas in dob tahun 1966 ope ase adong. Panorang pe bois, sipata loja ma, hape lang homa pajumpah. Sipata ra do kecewa diri, pnl.
Na sihol sobutonku ijin ai ma gari manalin marhitei surat tangan humbani 1 Musa 1, ayat ronsi Maliaki 4:6 gelah domma mahol. Anjaha age pitah manalin tumang ra do buei salah. Hape dob huterjernahkon, ningon suratkononku in bani surat ni tanganku sandiri.
Halani ai ra do lobih nansa kortas panuratanni na dob huterjemahkon in buei ni hortas na maseda ampa hugantih halani masalah-masalah songon na husobout i atas in.
Hansa ibagas na menterjernahkon ampa manuratkon ganupan Bibel in ahu, na gabe gogoh ampa apoh apoh bangku sadokah 10 tahun in ai ma:
- Anggo ahu pe lang sirsir, sonaha ma nani Kuria Simalungun boi mangarus Hata ni Naibata anjaha das bani haluahon.
- Anggo ahu pe lang sirsir janah rela bekerja keras, atap menyerah halani sonai fasilitas, aha ma gatni hamaholonkin matimbang juak-juak ni Naibata na manuratkon buku-buku ni Bibel on ijia. Anggo sidea maningon mangindahi laklak ampa alat tulisni ope. Anggo lang halani ra sidea loja janah berkorban halani Tuhan, aha ma gabe Bibel bennami panorang on?
Halani lape sadiha na hubahen on. Halani ai maningon saloseihononku do on gabe galanganku hubani Naibata.
Lang hubotoh hunja roh ni sora in bangku. Tapi in ma na roh hubangku sanggah na jumpah ahu sada masalah na banggal ibagas penterjemahan in. Anggo humbani hadirionku do panorang ai, ra tadingkonon bahkan paturutonku do sagang horja in.
Lanjar in ma homa gabe gogoh ampa apoh apoh bangku, ibagas buei tantangan, hambatan sadokah penterjernahan in ronsi na salosei.
Recent Comments