Songon na isobut i atas, anggo naskah domma salosei haganupan bani tahun 1971. Tading proses pengetikan akhir ampa koreksi pengetikan mando i Kantor Pusat. Dob ai urusan pencetakan ma.
Halani lang dong be sangkut pautnami bani horja in ronsi na siap cetak, halani ai lang sai hubotoh be pala ija deba ase sompat hundokah ase saud terbit Bibel bahasa Simalungun cetakan pertama on. Hansa sompat do tartangar ahu dong gan masalah percetakan hun Percetakan ni Gereja Methodis Indonesia i Tebing Tinggi. Gabe ioper ma use hu Lembaga Alkitab Indonesia (LAI) – Jakarta.
Tapi tarpuji ma Naibata. Halani bani tahun 1976, saud ma terbit Bibel Bahasa Simalungun cetakan pertama. Anjaha pasal on, patut hatarima kasihkononta hubani Tuhanta, halani marhiteihonni in:
- Lang pala loja be Pandita, Parhorja ni Kuria, Guru Sikolah Minggu, Pengurus Seksi ronsi Pagori ni Kuria in hujai-hujon mangindahi atap paterjemahkon ayat-ayat anggo tudu ai humbani Padan na Basaia.
- Boi ma haganup Kuria in parsimada ampa mambasa Hata ni Naibata ibagas bahasa ni sandiri aima bahasa Simalungun.
- Anjaha malas tumang homa uhurta, halani age hasomanta sahaporsayaon na i Simalungun (Katolik) dihut do mamakei Bibelta in anggo i Kuria ai bahasa Simalungun do ipakei sidea.
Hansa lang hubotoh atap na dob piga puluh ribu ma dob icetak Bibel Simalungun on. Anjaha domma piga hali icetak. Tapi anggo na hutangar ronsi sanggah na husuratkon Buku on, buei ope rumah tangga ni GKPS na lape dong Bibelni.
Lanjar marhitei Buku on ma homa ahu mangindohon, anjaha in do homa tonggongku, andohar ma ganup rumah Tangga ni GKPS parsimada barii buku Bibel na maharga tumang on anjaha ihabujurhon (setia) mambasa. Halani hunjin tumang do hansa jumpah hita dalan hu haluahon ibagas Jesus Kristus.
X. 1958-72: Halongagan, Pasu-pasu na Ibahen Naibata Paluahkon
Recent Comments