Dob ijalo ahu i HIS, malas tumang uhurhu. Humbani bois ni gogohku, hupongkutkon ma marlajar ampa marnatuhi haganupan aturan ronsi mandihuti kegiatan na iadongkon i sikolah on.
Age pe lape tardidi ahu, legan ni i parsikolahan, hudihuti do homa kegiatan i Gareja Bolon : mar minggu, mar Koor sonai ganup kegiatan ampa horja hakristenon, pnl. Anjaha marosuh tumang do homa ahu marbuali janah marsaor pakon tuan-tuan Pandita. Anjaha sidea pe marosuh tumang do homa tarlobih halani boi hupajojor parlajaran ampa ayat ayat ni Bibel ibagas bahasa Bolanda.
Domu hujin, lang piga hasomanku na mambotoh na lape tardidi ahu. Bahkan tangkas do hudingat, gati do isobut hasomanku sakalas ahu “domine”.
Maniak anjaha maruntol tumang uhurhu manjalo hata in. Isobut ahu domine. Hape tardidi pe lape. Ganupan on lambin padoraskon pergumulan ibagas diringku. Isobut ahu domine. Gari sihol ni uhurhu hu surga tumang pe lape tuntas hun bagas uhurhu, halani na lape tardidi ai ahu.
Podas lopus panorang. Lang naahapkon panorang torus mardalan.
Onom tahun ma abu dob sikolah i Schakelschool i Pamatangsiantar. Tahun parpudi ma sikolah i HIS. Lang piga dokah nari tammat ma. Tapi bani pihak na legan, 8 tahun ma homa dokah ni ahu torus margumul pasal Surga. Aima humbani tahun 1928 i Haranggaol marhitei barita pasal halak na bayak ampa si Lasarus na masombuh. Sonin ma dokahni, tapi lalab lape dong haputusan sikapku.
Dob tammat hun Schakelschool, hupindohon ma bani bapa ampa mang, age kost janah masak sandiri gelah ahu sambil marlajar hemat rup pakon hasoman hun Haranggaol. Deba ma ai si Hormat br. Simbolon, si Lina br. Saragih Simarmata, pnl. Sidea on domma tardidi.
Maila tumang do namin huahap bani diringku tarlobih dompak sidea, halani lalab lang tardidi ai ahu. Hape marminggu tiap minggu janah aktif i Gareja. Halani ai gati do ahu ipahata hata, sidea. Tapi sonaha ma bahenonku? Sonaha orangtuangku, saninakku, pnl. Anggo haporsayaonku, pitah bani Jesus tumang mando. Hansa lape pag ahu mambuat haputusan. On ma salahku na banggal.
Sihol Hu Surga, Barani Mambuat Haputusan
Tahun 1936, bani na sadari idilo Pdt. Israel Tambunan ma ahu. Isungkun ma ahu mase lalab lape tardidi. Hupatugah ma hubani sonaha namin sihol ni uhurhu ase dihut hu Surga. Lang hu Naraka songon nabayak ai. Hansa lang hubotoh sonaha domu bani keadaan ni bapangku, inangku, saninangku ronsi ganup keluarganami.
Ganjang do ibere Pandita on hatorangan hubangku. Janah intini aima, anggo sintong anjaha tongon-tongon do sihol uhur ni sada halak hu Surga, ningon pag do ia mambuat haputusan mangirikkon Jesus atap lang. Lang tarbahen alasan alasan na ijahani pe ai.
Dokah do ahu sip anjaha maruntol pasal hatani in. Tapi ujungni, hubaranihon ma mamutuskon maningon tardidi do ahu hubagas goran ni Naibata Bapa, pakon Tuhan Jesus Kristus ampa Tonduy Napansing songon na hinatahon ni Tuhan Jesus. Age pe lang tarbahen rup tarididi pakon bapa, inang ampa saninangku, tapi maningon tardidi do ahu, ase boi dihut hu Surga. Lang hu Naraka. Anjaha ahu maningon gabe siirikkon Jesus tumang ampa mangidangi-Si.
In ma haputusanku na hupadas hubani Pdt. Israel Tambunan panorang ai.
Recent Comments