Sada hasomalan do ai na ijia, halak na sihol tardidi lanjar dong do homa goran tambahan humbani goran sebelumni. Aima na gati isobut goran tardidi. Sonai ma homa ahu. Sadalan hubani haputusan ampa pangakuankin, lanjar ipindohon ma ase hupilih goranku anggo saud ma tardidi.
Halani domma hupatotap uhurhu, dob bagas hupingkiri, hupahusor-husor ibagas uhurhu anjaha hutonggohon, piga piga ari dob parjumpahan in, hujumpahkon ma Pdt. Israel Tambunan. Hupatugah ma hubani: “Domma hupilih anjaha hutonggohon. “Petrus” ma goranku “. Tapi lanjar hupatugah do: anggo goran Djadima in hot do adong. Hansa isingkat pitah “Dj” ni ma. Halani itongah tongah ni keluargangku, lang adong na manandai ahu si Petrus. Si Djadima Purba do. Tapi anggo idilohon lang be si Djadima. Petrus ma. Selengkapni Dj. Petrus Purba. Malas tumang uhumi Pdt. Israel bani parrohku pakon dob hupatugah gorankin. Dob marbuali, lanjar ipatugah ma panorang pandidion i HKBP Bregenstroth. Ai ma bulan Juni 1936. Panorang ai ma ihatahon au tardidi.
Tardidi Lanjar Manaksihon Haporsayaon – “Hamuliaonmi Do Na Huhasiholi, Ale Jahowa”
Dob mulak hun rumah ni Pdt. Israel Tambunan aniaha ipatugah panorang pandidion. Gabe pergumulan bangku aima: pala do nani hupatugah haputusankin bani bapa ampa inang? Patugahonku do homa nani panorang pandidionkin ase dihut sidea manaruhkon ahu hu Gereja HKBP Bregenstroth?
Hun segi panorang, sompat ope namin mulak ahu hu Purbasaribu patugahkon in. Sidea pe, sompat ope pasirsirhon diri anggo sirsir do sidea manaruhkon aun bani pandidion in. Tarlobih dong do motor ni sidea. Dokah do ahu margumul pasal on anjaha mabiar do ahu anggo pala lang satuju sidea. Ujungni huputuskon ma, dearan ma dob salpu tardidi ase hupatugah bani sidea.
Minggu, 14 Juni 1936. Girah sogod marugas ma au pasirsir diringku hu gareja laho tardidi. Borhat ma ahu tanpa bapa, inang atap sanina, kecuali piga piga hasomanku kost i Jl. Toba. Lungun do namin pangahap. Tapi aha pe lang haganupan in, marimbang sihol ni uhurhu ase dihut hu surga.
Das i Gereja HKBP Bregenstroth (Gereja Bolon), mintor isalami hasomanku do ahu. Ijai ma sidea porsaya na so tardidi ope ahu, age pe anggo kegiatan i Gereja domma aktif ahu sadokahni on. Bahkan deba sidea manobut ahu Domine. Rup ma hanami hundul pakon hasomanku na sihol Tardidi lanjar Manaksihon Haporsayaon.
Sanggah jumpah panorangku manjalo pandidion, hutangar ma idilohon goranku : “Petrus Purba”, lang be “Djadima Purba”. On ma parlobei sahali idilohon goranku: Petrus Purba. Aima idilohon juakjuak-Ni i rumah ni Naibata. Lanjar ididi ma ahu hubagas goran ni Naibata Bapa pakon Tuhan Jesus Kristus ampa Tonduy Napansing. Malas tumang uhurhu panorang ai.
Dob salosel ididi, itogu ma ahu jongjong. Idilohon ma use goranku na bayu ai. Goranku ibagas Jesus. Lanjar irik ibasahon ma hubangku sada ayat ibagas bahasa Toba : “Hamuliaon-Mi do na huhasiholi, ale jahowa” (I Musa 49:18).
On ma ayat Manaksihon na iondoskon bangku. Age pe bani panorang ai, lang pala sai huarusi botul ope artini Hata in. Tapi lambin dokah lambin hurenungkon, anjaha ujungni jumpah ahu ma artini Hata in bangku. Ningon hamuliaonni Jahowa do gabe sihol ni uhurhu ampa sibahenonku ibagas haganup goluhku, ase parsimada ahu bani Surga na pinasirsir-Ni in.
Aha na hualami bani Minggu 14 Juni 1936 on lang ongga tarlupahon ahu ibagas goluhku. Legan tumang huahapkon ari in humbani ari ari na salpu. Ari na gok malas ni uhur anjaha halongangan. Anjaha dob salpu acara i Gareja isalami Kuria in ma hanami. Dob ai mulak ma hanami hu rumah kost. Age pe lang dong acara na khusus ibahen hanami, tapi malas tumang do uhurhu bani idop ni uhur ni Tuhan in.
Lanjar hata ni Naibata in ma gabe onjolan ampa kompas bangku manoruskon parsikolahanku ampa goluhku. Aima: “HamuliaonMu do na huhasiholhon ale Jahowa”.
Recent Comments