Lang piga dokah dob Pandidion in, jumpah ma panorang penamatan. Ai ma buah pertama ni sikolah HIS (Hollandsch Inlandsche School) Pematangsiantar. Humbani 40 halak hanami ijalo bulan Juli 1931, lang haganupan tammat. Anjaha malas tumang uhurhu, janah tarpuji ma Tuhan Jesus Kristus halani boi do ahu salosei ibagas nilai na dear.
Bani panorang penamatan in, roh do Bapa pakon inang. Lanjar ijai ma parlobei itangar sidea goranku idilohon lang be Djadima Purba. Tapi Dj. Petrus Purba. Hansa lang pala sungkun-sungkun be sidea, halani domma hupatugah hinan age pasal Pandidionku. Janah sidea pe iarusi do, halani ganup na sikolah panorang ai, umumni domma tardidi anjaha gabe Kristen.
Dob salpu acara, mulak ma hanami. Malas tumang uhur ni sidea sonai saninangku dob das hanami i Mariah Purbasaribu. Hansa ilopah ni ai lang ibotoh sidea, adong do pergumulan na baru ibagas diringku: Tammat ma ahu. Sonaha anjaha huja ma use nani ahu?
Bab IV. Guru Magang i Haranggaol,Tuhan Mambuka Dalan na Baru >>
Recent Comments