Tahun 1928, laho penaikan hu kalas III, bani na sadari sanggah marlajar agama Kristen hanami, ibaritahon Guru Iskandar Simajuntak ma hubannami Lukas 16:19-31. Aima pasal halak na bayak ampa si Lasarus na masombuh. Mangonai tumang barita in hubagas uhurhu. Anjaha torus do in maraloling ibagas diringku. Nini Guru on patorangkon : “…. Age sonai sombuh ni si Lazarus sanggah goluh ni i dunia on, ronsi mapas ni uhurni na bayak ai hubani, tapi ibagas haganupan sitarononni ai, lang mardosa si Lazarus”.
Ilanjutkon ma barita ai marhitei na patugahkon sonaha keadaan ni sidea dob marujung goluh hun dunia on. Nini Guru on : “la si Lasarus iboban ma hu surga rup pakon si Abraham. Age pe sonai sombuh ni hinan sanggah i dunia on, tapi lang hope torus sonai. Ujungni bani na sonang tumang do ia marianan. Ai ma i surga rup pakon Naibata.
Sabalikni halak na bayak ai, bani goluhni i dunia on aha pe lang na hurangni. Ganupan do boi ibahen domu bani rosuhni. Tapi lang torus hape ia boi sonai. Marujung do homa goluhni. Tapi hu naraka i nagori toruh do iananni. Aha na iahapkon i dunia on, otik pe lang jumpahsi ijai. Tongkin do hansa ijaloni na sonang, aima sanggah goluhni i dunia on. Ujungni bani ianan na gok partangisan ampa hamarsikon ai ma ia. Jangin anjaha sombuh tumang. Santektek bah gelah, ipalar ma namin. Tapi ai pe lang boi dapotsi. Ilajou do mangindohon ase roh namin si Lazarus age pitah mandaiskon bah gelah bani bibirni. Tapi ai pe lang boi be”.
Iujungi Guru Iskandar ma barita on. Isungkun ma hanami, nini : a) “Ise nasiam na marosuh hu surga”. Spontan ganup hanami martuduh. Janah ahu, sihol tumang uhurhu hujai. b) Dob ai isungkun use hanami: “Ise marosuh hu naraka”. Sada pe tang be na martuduh! Tarlobih ahu mabiar tumang do hujai! c) Ihatahon ma homa use : Sonaha ma hanima boi hu surga, ai tardidi pe lang ra hanima. Halani nini Tuhan Jesus do no porsaya anjaha tardidi ai do no boi hu surga. Ase anggo lang porsaya anjaha tardidi, hu naraka do hanima”, nini.
Recent Comments