3. Martumpu Ganup Ginomparhu

Sadalan hubani suratku na mangindohon ase martumpu haganup niombahku, dos ma riah ni sidea. iadongkon ma tumpuan in bani ari Sabtu tanggal 23 Oktober 2004. Anjaha mamungkah tanggal 21 Oktober, domma roh niornbah hun huta na daoh. Tanggal 22 Oktoher tumpu ma haganupan i rumah: na hun Jakarta, hun Pasir Mandogei ampa Siantar sekitarni. Ahu pe domma sehat huahap.

Sompat do husurahon hinan acara on, ase ipungkah marhitei kebaktian ampa Horia Banggal Napansing. Domma homa ihubungi hasirsiron ni Pdt. Dr. A. Munthe, MTh. Janah Pandita on pe domma ipasirsir dirini. Hansa halani sompit ni panorang, tarlobih na hun huta na daoh, gabe sompat do tanggal ai marubah¬ubah. Ujungni iputuskon ma. santorap on pitah hananmi ampa ginomparnami ma lobei. Anjaha paima acara ai, roh do panogolanku St. Ir. Oskar Sipayung. Tapi halani Sidang Majelis Gereja sidea, ia pe lang be idihuti acara ai.

Pukul 11.30 ipungkah ma acara :
a) Mangan riap: niombah manurdukkon sipanganon bennami
b) Kebaktian Syukur lanjar marpodah ahu

  • Mandoding humbani Haleluya
  • Resposoria
  • Mandoding ganup pahompungku
  • Mambasa Psalmen
  • Marpodah ahu hubani ganup niombah, parumaen, hela, ampa pahompuku, iselingi doding pakon renungan
  • Doa syukur ampa syafaat ibobahon anakku sikahanan
  • Doding – Tonggo Panutup

Dob ai roh ma haganup ginomparhu manalami au pakon Inang.

Hamuliaon ni Jahowa Do na Paluahkon, Manogu-nogu, Pamalumhon ampa Pagolunkon

Malas tumang uhurhu sonai ganup ginomparhu bani acara in. Anjaha sintong-sintong, songon -hata ni Naibata na hujalo sanggah Manaksihon Haporsayaon (na gabe Judul ni Buku on), “Hamuliaon¬Mu do na Huhasihon, ale Jahowa“, ai do na huaIami ibagas goluhku. “Songon hamuliaon ni Jahowa na padaratkon, mambobai, melindungi, manjagai bangsa Israel na sanggah kaluar hun Masir”, ai do homa na patorsa-torsahon goluhku, goluhni niomhahnami haganupan sadokahni on:

a) Halani Hamuliaon ni Jahowa do na mandilo anjaha mambahen barani ahu mamutuskon tardidi age pe lang satuju ope bapa ampa inangku.

b) Hamuliaon ni Jahowa do na paluahkon ahu pakon anggingku sanggah na hona tutung rumahnami i Pangambatan.

c) Hamuliaon ni Jahowa do na patuduh dalan ampa manogu-nogu tangan ni inang ampa tanganku sanggah na mangungsi hanami hu Pakpak.

d) Hamuliaon ni Jahowa do na parmanhon anakku Si Agustin sanggah idorab setan i Pak-pak janah hupindohon hubani Naibata, “Lang marmulia be goran-Mu bani parhuta on, anggo matei do anakkon. Halani ai pagoluh Ham on”, ningku; mintor ipaluah. Sonai do horna niombahku haganup,

e) Hamuliaon ni Jahowa do homa na pasirsirhon ampa mambere sipanganon bennarni sanggah masa ni lohei marhitei na mamagar omeinami ulang ipangan ubag pakon antinganou.

f) Hamuliaon ni Jahowa do mabere hapintaran ampa gogoh hubangku age hubani haganup niombah ampa ginomparhu. Halani anggo humbani gogohku do, hunja ma mampu ahu menterjemahkon Bibelta in, mangidangi hu rumah sakit ronsi na matua ahu?

g) Hamuliaon ni Jahowa do homa na paluahkon ampa pagoJuhkon ahu bani naboritkon. Anggo hamaloan ni jolma do, nasiam pe domma tarbador. lbahen nasiam podomanku matei ampa na porlu untuk panguburanku, hape ipagoluh ahu use.

h) Hamuliaon ni Jahowa do na manramotkon parrumah-tanggaonnarni ronsi 61 tahun, lape ongga maringori, marsirang-sirang, pakon na legan na lang targorani ahu sada-sada.

Domu hubani ganup na husobut i atas in, anggo ahu domma ipasaud Naibata haganup sura-sura ampa pangindoanku. Buei tumang ginompar ibere Naibata hubangku. Ipasaud do bagah-bagahni:
Martumbor do parpintor soporti hayu in,
Marranting do mamintor no songon ares in,
Sidea na sinuan i parmingguan in,
Martuah do sidea i alamanni in.

Domma hujalo haganupan on humbani Naibata. Ambit lang huputuskon gabe mangirikkon Jesus tahun 1936, ra lang boi jaloonku ganupan in. Halani na sombuh do anggo pasal ginompar humbani ompungku ronsi bapangku. Anjaha lang pitah in nadob hujalo ampa hualami. On pe domma tangkas huidah haganupan, sonai age ganup ginomparhu:

Sai tubuh ginomparni bai na ubanan in.
Margogoh do homani na dob matua in.
Ringgas iambilankon na pintor Tuhan in.
Na so marhagedukon ganup pambaen-Ni in.

2. Ganupan in lang hata-hata. Tapi domma hualami ampa ididah matanta haganupan. Domma matua ahu. Jalan 89 tahun. Tapi boi ope huidah tubuh ginomparhu ronsi niombahni pahompungku. Age domma matua ahu, ronsi paima na boritan ahu, tapi torus do margogoh ahu. Ai ma ase haganup goluhku, sai tong do huharinggaskon padaskon barita pasal hapintoron ni Naibata. Bahkan haganupan in domma hita ibagas keluaganta.

3. Halani ai, rimpunni aima songon na dob gati hupadas lanjar in do homa hupangindohon ampa hupodahkon sonari hubani nasiam ganup niombahnami na 12 rumah tangga mamungkah humbani sikahanan, ronsi pahompungku ampa nonongku nabueei haganup 46 halak
Mateus 6: 33

Parlobei ma pindahi hanima harajaon ni Naibata ampa hapintoranni, dob ai tambahkononNi do ganupan ai bannima.

Tetapi carilah dahulu Kerajaan Allah dan kebenarannya, maka semuanya itu akan ditambahkan kepadamu.

But seek ye first the kingdom of God, and his righteousness; and all these things shall be added unto you.

4. Domma Hudobkon Parlumbaanku >>