Patarni pe ari Senen tanggal 6 September, nini sidea age dokter, songon na menyerah ma naha pangindoan ni keluarga. Bahkan anggo tondong St. Marsiaman mabiar tumang ma gan ia anggo icabut honsi ganupan peralatan na ipakei bani angkulangku, ra ma salpu. Halani garis jantungku bani komputerni ai pe gan lang be marganjang. 

Janah domu hujon, sekitar pukul 15.00 WIB sompat ma mandorak anakku si Polikarpus pakon si Robert halani ididah domma songon na laho bois ma gan. Sonai anakku Si Christianus ampa parumaen sekitar pukul 15.45 das sidea, anjaha isungkun gan i recepsionis, sompat do gan homa ihatahon sidea, domma marujung, ai ope. Tangis ijai nini sidea. Gabe iolos ma naik hu lantai II. Hape manggoluh ope gan ahu.

Pindah hu Ruangan Halani Lang Be Harapan

Sintong barang lang haganupan in, au pe lang hubotoh. Anjaha anggo nini sidea, iputuskon pe ase iboan sidea ahu be kamarhu i Lantai III kamar 304, halani na so harapan be – nini dokter, i ruangan ma paima nasiam, martonggo. Anjaha lang tarpaidah-idah sidea ahu lalab marsik tumang i ICU. Aima, anggo turun denyutan ni jantungku, mintor isuntikkon sidea tong tambar, baru pe agak tenang use. Tapi tong lang sadar. Sonai ma torus i ICU ai. Sementara angkulangku domma mangilu tumang, kaku, janah naheihu pe pitah sahali-sahali mando songon na mangkitir.

Mangidah in ma ase sore-sore ari Senen ai, manriah ma use sidea haganup. Anjaha martonggo. Dob ai iputuskon sidea ma, lang pala be iparartahankon i ICU ahu. Halani ai iboan ma ahu hu kamarhu hinan i Lantai

Tujuannni ase boi sidea rap i kamar haganup manginggoti ahu, mandoding ampa martonggo mangondoskon hubani Naibata.

Lang pitah sidea marpingkiran ampa marpandapot sonai. Tapi age naroh mangidah ahu sonai piga-piga para medis pe domma sonai pandapot ni sidea. Anjaha saud ma iboan sidea gan ahu hu kamar pukul 20.00 WIB.

Lang piga dokah dob ai, marhusor ma au, hubuka ma panonggorhu anjaha marsahap. Memang ijai ma ahu mulai sadar. Anjaha huidah ma na ijai ganup niombahku 12 keluarga ampa pahompungku manginggoti ahu. Malas tumang uhurhu mangidah ai. Lanjar huidah ma use sidea margantihan martonggo. Dob ai hupindo ma teh, anjaha minum ma ahu. Dob ai marsahap ma ahu, age pe lang boi gok, halani dilahku itarik ope hubagas. Malas uhur ni sidea haganupan mangidah ahu, sonai age ahu mangidah sidea. On ma na hualami bodari ni ari Senen, 6 September ai, aima sekitar pukul 20.45. Anggo paima ai, aha pe lang na hubotoh. Pitah turi-turian ni sidea do hansa, sonai rekaman ni video na ibuat sidea tanggal 5 September ampa piga-piga foto sanggah i ICU ahu.

Anjaha dob i kamar on ahu, lang pala isuntikkon be, tambar na ipakei sadokahni on. Anjaha marangsur-angsur lambin martambah kesehatamku tiap ari. Boi ma homa ahu marhosah dear. Hansa batukku parah. Anjaha dilahku mangkaliklik. Isuruh dokter ma homa ase hulatih dilahku hupadarat, hugerak-gerakkon. Anjaha tolu ari dob I kamar ai ahu, mulai ma normal haganup huahap. Oksigen pe ibuka ma. Mangan pe lang be lewat selang, tapi ibere ma humbani pamangan. Sonal ma torus.

Halongangan do haganupan na masa in atap bani ise pe na sompat mangidah ahu. Lang pitah bani keluarga, age bani kesehatan/parrumah sakit na manrawat ahu. Anjaha ganupan ai, pitah halani horja ni Tuhan tumang do, ase mulak manggoluh ahu.

Mangidah haganupan in, malas tumang ma uhur ni ganup niombah ronsi pahompungku. Janah dob mangidah perkembangan ni kesehatanku, sidea parhuta daoh, mintor hupapos do uhur ni sidea. Dob isungkun ahu, atap boi ma sidea mulak, mintor hundukkon do.
Halani ai marsilobeinan ma sidea parmisi hubangku.

• Ari 7 September, parmisi ma anakku pakon parumaen na hun Cipayung, Kel. Eduard Purba, halani hun Penang do sidea langsung hu Siantar mangidah ahu.
• Ari 8 September parmisi mulak ma homa anakku sikahanan ampa parumaen hun Depok, Kel Marhaposan Purba. Anggo hatolusi pahompu hunjai gan tanggal 6 September domma parlobei mulak hu Bali ampa na hu Jakarta halani horja ni sidea.
• Ari 9 September parmisi ma boma borungku ampa hela, Blandina Purba/Janpiter Sipayung, pakon haduasi pahompung na hun Lampung.
• Ari 10 parmisi ma anakku nomor 2 ampa parumaen mulak hun Bekasi.

Tapi anggo na hun Riau, Pasir Mandogei, Pematang Siantar ampa Pematang Raya, margantihan ma sidea torus manjaga au, ronsi na mulak ari 13 September.

Sonin ma keadaanku ipaluah anjaha ipagoluh Tuhan. Turi-turian do hutangar humbani sidea, aha pe lang na hubotoh kecuali na tarjadi mamungkah humbani tanggal 6 September bodari ronsi panorang on. Anggo humbani tanggal 1 September pukul 13.00 ronsi Senen tanggaI 6 pukul 20.45 ai, aha pe lang hubotoh atap na ija ahu. Ronsi sonari, hulajou-lajou do mandingati tapi golap tumang do.

Hansa bukti ni na dob iparsiapkon ganup niombahku ampa inang sagala na porlu anggo saud ma ahu matela ai, gambarhu, baju togaku, baju jas ni ganup niombahku ampa hela, anjaha na terutama aima podomanku i rumah dob mulak ahu domma na baru. Husungkun sidea mase adong ai, ipatugah sidea ma. Anjaha bani podoman ai ma ahu modom age sanggah na isusun Buku on. Hansa lang modom halani na matei. Tapi halani manggoluh do use ibahen Tuhan.

Ase tarpuji ma Naibata Bapa in ampa Tuhan Jesus Kristus ampa Tonduy Napansing, na paulakkon ahu humhani hamateian hu hagoluhan. Age pe dong do gan hinan prediksi ni dokter domu hubani pengecilan otak halani na lojatu ai sadokah ni on, anggo manggoluh pe mungkin lumpuh janah lang boi mardingat atap aha pe.

Tapi Naibata paluhkon ahu. Lang dong na hurang age sada atap lumpuh barang pitung ahu. Ganupan dear, hansa agak galek ape nuan.
Andohar marhitei kuasa ni Naibata, boi gabe patotap uhur mami ganupan hubani Naibata, anjaha das haganup hu nagori atas.

Dob saminggu ahu ijai, ari Senen tanggal 13 September pukul 13.30, halani domma sehat huahap hupangindo ma ase mulak hu rumah. Anjaha saud ma hanami mulak ibagas malas ni uhur ampa na martarima kasih hubani Naibata.

XIII. Domma Husaloseihon Parlumbaanku >>