Dob mulak hun Jerman, bani tahun 1978 in, itugaskon ma ahu gabe Pandita Evanggelis Umum GKPS. Domu hujin, na toruskon ma kerja sama pakon par-Bibelstudi na i Martoba (i rumah ni St. Belman Sumbayak) pakon SPI (Seksi Pekabaran Injil) GKPS JI. Sisingamangaraja na dob ipungkah hinan sanggah Pandita Resort Siantar II ope ahu. Halani secara umum Pengurus ni SPI, in do homa anggota ni Bibelsudi ai, gabe panorang Bibelstudi boi ma homa ipakei kesempatan mansahapi horja Pekabaran Injil.
Marhitei kerja sama in haduasi kegiatan on saling menopang anjaha berkembang. Na roh Bibelstudi pe martambah lanjar sidea ma gabe anggota inti ni SPI. Iadongkon SPI ma program mambahen panohuon ampa evangelisasi bani piga-piga Kuria sonai manggerakkon parjongjong ni Kuria bani piga-piga ianan secara khusus na dob ipungkah hinan i daerah Asahan Labuhan Batu.
Marhitei gagasan in, mangihut ma homa Seksi Bapa GKPS. Ujung ni huja pe SPI mardalan dihut ma Seksi Bapa mar-Koor. Anggo motor (mobil) adong ma tong ipasirsir Direksi Sepadan, St. Poltak Saragih atap St. Jaitam Purba.
Adong do piga-piga daerah ampa Kuria na itohu SPI on, deba hunjai ai ma hu daerah Asahan-Labuhan Batu, manggerakkon GKPS i Silinduk (Jawa haganup pagorini), hu Serdang, Raya Usang ampa daerah Saribu Dolok. Anggo iadongkon evangelisasi, marborgin ma rombongan on, sonai pakon Seksi Bapa.
Isamping ni marhitei Bibelsudi/SPI JI. Sisingamangaraja, borhat do homa ahu manohu Kuria na agak poso ope. Kerja sama pakon Pandita Resort, iadongkon hanami ma ijai Evangelisasi. Patarni Kebaktian Minggu. Sipata anggo dong sipatorsaon, sikunjungon (naboritan, na ibagas sitaronon), ari Senen ni ma ahu mulak.
Legan ni i daerah Sumatera Utara, itugaskon Pimpinan Pusat do homa ahu hu daerah Riau, secara khusus ma ai hu Kuria Pekan Baru. Pala do 3 minggu ahu ijai mambahen partumpuan. Hunjai torus ma hu Sumatera Barat ampa Sumatera Selatan manjajagi ase jongjong Kuria i Jambi, Palembang, Bengkulu ampa Bandar Lampung. Pala do 2 minggu ahu ijai mambobahon partumpuan ni Simalungun. Lanjar bani tumpuan in ma isahapkon kemungkinan pajongjongkon Kuria GKPS i daerah Sumatera Barat ampa Selatan.
Malas tumang do uhur ni Kuria in bani parrohku. Ipasirsir sidea do haganup na porlu. Age ronsi parborhatku hu Sumatera Barat sidea do mangkasomani ronsi patuduhkon hasoman Simalungun na ijai ai bangku.
Ase tarpuji ma Tuhanta, halani ujungni saud anjaha marbanggal do Kuria ni Tuhan in baik i Riau ampa i Jambi, ronsi na dob gabe Resort ma ai sonari.
Recent Comments