Sadalan hubani Progam/Kurikulum, bulan Agustus 1952 salosei ma Pendidikan nami. Anjaha bulan September ma iadongkon pamasumasuon mangondoskon Tohonan Hapanditaon.
Tapi bani bulan Juli domma tarburtik otik-otik barita domu hubani Surat ni Ephorus HKBP Pdt. Justin Sihombing pasal penempatannami na pitu dob ipasupasu. Pitah 3 halak hansa hanami mangidangi i HKBP Distrik Simalungun. Na 4 halak nari: sahalak hu Distrik Sumatera Timur anjaha 3 halak hu Distrik Toba ampa Humbang.
Pusok do uhurnami manangar barita in. Lang na so ra hanami atap huja pe itempatkon. Hansa domu hubani perjanjian hinan paima ipungkah Sikolah, hapitusi do hanami i Distrik Simalungun itempatkon mangidangi pagori ni HKBP na marbahasa Simalungun.
Ai do ase na marnbalanjai hanami pe, aima Kuria na i Simalungun marhitei tiap rumah tangga patumpulion boras tiap bulan. Halani ai, marhitei haputusan in, boi mambahen hurang sonang pangahap ni pagori ni Kuria na i Simalungun.
Diatei ma. Holong uhur ni Tuhan. Ibere do hubani Pdt. J. Wismar Saragih ampa hasomanni hapentaron mansaloseihon haputusan in. Bulan Agustus ipatumpu Pdt. J. Wismar ma hanami hapitusi mansahapkon in. Anjaha haganup hanami manulak haputusan in. Hansa na porlu sonaha ase manjalo pasu-pasu Tohonan Hapanditaon lobei hanami.
Bani bulan Agustus in, ujian ma homa hanami ibobahon Pandita F. Siregar ampa hasomanni hun Pematang Siantar ampa Kantor Pusat HKBP. Anjaha monang do hanami hapitusi. Dob ai ibahen Pdt. J. Wismar Saragih ma surat pangindoan hu Kantor Pusat HKBP ase ipasu pasu hanami. Lang piga dokah roh ma balos ni Ephorus, saud ma ipasu pasu hanami, aima bani ari Minggu 28 September 1952 i HKBP Pamatang Raya.
Diploma atau Ijazah tanda lulus Pdt J Petrus hun Sekolah Pendeta HKBP na iadongkon i Pematang Raya 3 September 1950 – 28 September 1952 na i itanda tangani Ephorus HKBP Dr. J. Sihombing
Bani panorang pamasu-masuon in roh do Ephorus Dr. J. Sihombing, Praeses Distrik Samosir (Pdt. R Panggabean), Praeses Distrik Toba (Pdt. C. Simajuntak), Praeses Distrik Sumatra Timur (Pdt. J. Toga Torop) sonai Ds. P. Sihombing, Pdt. Alfred Hutapea pakon Pandita na i Simalungun. Hun Pamarentah hadir do Bupati, Tuan Maja Purba sonai pejabat Kehakiman/Kejaksaan ampa buei Camat. Lanjar Bupati do na mambere kata sambutan bani Pamasu-masuon in mewakili Pamarentah.
Age pe lang umum ope mambotoh masalah in, tapi anggo Bupati hinaotikni domma ibotoh. Taridah do ai humbani kata-kata Sambutanni na menyinggung masalah in. Pangkorhonni ai, pagori ampa parhorja ni Kuria na i Simalungun na buei hadir panorang ai, gabe ganup use mambotoh. Janah lang na botoh atap halani ai ma ase lang sadari ni ai iumumhon Ephorus HKBP penempatannami.
Recent Comments