Paima masa peristiwa naborat tumang bani tahun 1946-1947, ise pe lang mambotoh ampa mangarusi on. Bani tahun 1946 adong ma sada halak na mulak hun parrantoan. Dob piga piga dokah i huta, roh ma ia mangindohon ase huajari anjaha dihut ia gabe Guru Panolong i parsikolahan lanjar mangkasomani ahu padaskon Ambilan na Madear in hu huta huta isekitar Pangambatan ai.
Bani mungkah ni lang pala bagas huarusi artini pangindoannion. Anjaha ninuhur ia pe lang. Parhuta Pangambatan pe lang. Na boi hudidah panorang ai sibar dari pada soh soh ia. Gabe hujalo. Anjaha tarahap ma tongon boi mangurupi ahu.
Goran ni bapa ai aima Pintu Simanjorang. Aima namatoras ni SO Melanton Simanjorang, SH (hutangar sonari i Medan). Dob tardidi goran ni J. Mateus Simanjorang. Anggo ronsi tahun 1946, sibar mangurupi tumang hansa ia nuhurhu. Anjaha malas uhurhu, halani boi ma hanami mambaritahon Ambilan na Madear hu Paitibi Tembe pakon Pansur Batu ampa mangurupi An mangajari Marguru Doding, Partonggoan sonai mangajari i Parsikolahan. Na mambahen longang homa uhur aima, age inang i rumahni pe otik pe lang sipanlanglangi, age pe marhitehon ni na sonai, gati pitah inang ai ma hu juma atap hu tiga.
Tapi ijon ma huarusi. Anggo bani Naibata, paima ibotoh jolma aha na sihol masa, domma ibotoh anjaha domma homa iparsiapkon na porlu hujin.
Bani parroh ni Bolanda tahun 1947, maningon mangungsi do ganup par Pangambatan termasuk hanami sekeluarga. Tapi itongah tongah ni pangungsian on pe lang tarolat pardas ni Ambilan na Madear in sonai ronsi parmingguanuan. Halani age lang rup be hanami pakon par Pangambatan, St. Mateus on ma mangkorjahon ganup tugasku mambobahon sidea. Sonai do dob mulak hun pangungsian. Paima roh Gr. Julius Purba pakon Gr. Kerpanus Purba; St. J. Mateus Simanjorang on ma homa na gabe guru mangajari i parsikolahan sonai mangkobasi sagala horja i Kuria.
Mararti do ai, marhitei Sintua on, lang sompat lowong parmahan ampa pangajari ibahen Naibata i Pangambatan. Anjaha ia ma na gabe Pengantar Jemaat GKPS Pangambatan das hubani masa bakti 1980- 1985.
Tarima kasih ma bani Tuhan na dob pasirsirhon ampa mamakeisi. Anjaha tarima kasih ma homa bani St. J. Mateus Simanjorang sonai ganup keluargani.
Recent Comments