Bab V. 1939-50 Dasa Warsa Na Gok Pergumulan Ampa Pasu-Pasu

Pamatang Raya na Dob Mamungkah Siang

Sadalan hubani penempatan na hujalo hun Kantor Pusat HKBP sanggah penabalan i Sipoholon, dob piga-piga ari i Mariah Purbasaribu, borhat ma ahu hu Pamatang Raya. Ai ma hu Sikolah Zending i Aman Raya, na ibangun Pdt. August Theis. St. Poltak Saragih do ijin gabe guru pakon si Tioma br. Sinaga. Tapi marhitei penempatanku, pindah ma St. Poltak hu Pematangsiantar. Anjaha das ma ahu i Pamatang Raya bulan Agustus tahun 1939.

Domma buei na dob Kristen i Pamatang Raya, sonai pergerakan Kristen na igagasi Pdt. Wismar Saragih, Gr. Jason Saragih, Kongsi Laita, pnl. Marhiteihon ni ai, lang pala mahol be mangarahkon dakdanak ase ra marsikolah.

Horja i Kuria pe, domma buei Parhorja na boi mangurupi. Anjaha Gareja pe lang be i parsikolahan. Domma pindah janah ibangun bani ianan sisonari.

Boi hatahonon domma mamungkah siang janah maju age pargoluhon ni halak Kristen na i Pematang Raya panorang ai. Lang pala buei be taridah goluh hasipajuh-begubeguon. Orangtua pe domma mangarusi porluni marsuruh niombahni sikolah, manggunahon panorang, pnl. Domma mamungkah lihar. Hasoman marbuali martukar pingkiran ampa pabagas pangarusion pe domma buei. Halani ai anggo horja i Sikolah sonai i Kuria lang pala sai jumpah be tantangan na borat panorang ai.

>>Pangambatan: Kuasa ni Jesus Itongah Tongah ni Hagolapan