Piga-piga Hali Boritan

Anggo sibar 3 tahun torus marpingkir, manterjernahkon, manulis torus marhorja domu bani jadwal na hubahen, margogoh tumang ope ahu. Tapi tahun paompatkon sompat do piga-piga hali galek. Sompat do piga-piga hali boritan anjaha opname i rumah sakit Bethesda Saribu Dolok. Piga piga hali tompas i dalan, pnl.

Ra lang pala hamelaon ai anggo na sobut, halani ai ma memang kenyataan panorang ai. Itongah tongah ni na sonin borat ni horja, jarang turnang do boi mangankon sipanganon na cukup gizi. Lang halani tudu buei niombahku anjaha marsikolah homa. Tapi sonai ma keadaan panorang ai. Lang pitah halani belanja/gaji na otik tumang ope panorang ai. Tapi sibolion pe tarbatas tumang ope tarlobih antara tahun 1960-1966. Halani ai diatei ma sipata adong susu kotak eks Amerika na ibere ni Pdt. J. Deppermann, ai ma ase minum susu. Anggo bois ma ai, teh manis barang kopi ma. Sipata gula pe mahol bolion, halani haganup ningon hu koperasi. Ikan asin pe hu koperasi, pnl.

Tapi lanjar ijin do ganjang ni tangan ni Naibata laho mangurupi. Santorab sanggah koreksi hanami i rumah ni Pdt. J. Deppermann, ongga do mintor galek anjaha tompas ahu lao jongjong. Mintor iboan sidea ma ahu hu dokter anjaha ipareksa. Atap sonaha parsahapan ni sidea pakon dokter, dob sehat ahu mintor iusulhon inang ai ma, ase i rumah ai ma ahu tong mangan siang salpuhonsi koreksi. Anjaha lang piga dokah dob ai, roh ma tong kiriman hun Jerman ibagas kotak melalui Kantor Pos marisi susu, daging kaleng, sipata keju, pnl. Anggo sonari on ra maila ma diri, galek halani hurang ni gizi na masuk ibanding horja na ilahoi. Tapi sonai ma jaman ai. Anjaha dob ai lang ongga be pala targanggu kesehatanku. Gabe boi torus mardalan horja in.

 >> Penyempurnaan Terjemahan Padan Na Baru