Halani sikolah Volkschool ope panorang ai sikolah zending i Haranggaol, sibar kalas sada das bani kalas tolu do hansa. Anggo lanjutanni hu Schakelschool atap Vervolkschool pitah i Siantar ope adong. Halani ai dob tammat ahu hun Volkschool tahun 1929, mulak ma lobei hu Manah Purba Saribu. Anjaha soh ma lobei, halani lang na botoh huja boi malanjut.
Lang namin na lang dong duit ni bapa. Tapi huja ma malanjut?
Domu bani aturan panorang ai, na boi malanjut hu Vervolkschool maningon ibotoh do bahasa Bolanda. Mararti do ai, anggo Volkschool ningon lobei hun Schakelschool do ase boi melanjut. Anjaha sikolah Schakelschool pitah i Siantar pakon Kabanjahe ope adong. Tapi halani pangalaman na salpu, lang pos tumang ope uhurni bapa pakon inang paluahkon ahu.
Ibagas haganupan on pusok tumang do uhurhu. Hansa lang hubotoh aha sibahenonku.
Hape ibagas na lang hubotoh, domma piga-piga hali Ev. Johannes Panggabean manjumpahkon bapa i Tiga Langgiung. Aima mang-elek-elek bapa ase ilanjutkon sikolahku hu Schakelschool i Pematangsiantar.
Atap sonaha parbualan ni sidea, lang hubotoh. Tapi porsaya do ahu, Tuhan do na marhorja hubani juak-juak-Ni in, sonai hubagas uhur ni bapa ampa inang.
Ujungni satuju ma sidea. Ibere ma hulanjutkon sikolahku hu Pamatangsiantar. Tahun 1930 ma ai.
Recent Comments