Songon na dob isobut i atas in, dob manomboh pukul 02.30, tenang ma torus ronsi pukul 07.00. Mangidah perkembangan ini, malas ma uhurnami anjaha ganupan merasa tenang ma lobei. Halani ai, adeknami bapak si Yuyuk (Ambrosius), bapak Lois (Polikarpus) ampa na si anggi, lae bapak Grace (Kesman Saragih), mulak ma ma tongkin sidea. Tading ma hanami ijai: inang, botou Pdt. Vivia Perpetua, ahu (Pdt Christianus) pakon inang i rumah.
Hanami na ompat pe agak tenang ma pangahapnami mangidah bapa on, halani songon na tarpodom in do ia. Halani ai, pukul 06.30, na suruh ma inangnami mambahen inumon ampa serapan, aha na adong. Dob ai minum ma hanamni haompatsi, sambil taringat bani keadaan ni bapa on na sogod ai.
Pukul 07.05, dob bois bei inumonni, tading marbual-hual mando, sompong ididah inang ma bapa on songon na sosak use. Anjaha santorab on, lobih parah ma humbani sebelumni. Ai do ase ihatahon inang: “Ahh, santorab on borhat ma bapa on, bahen ma tonggo in”, nini. Halani ai martonggo hanami na ompat mangondoskon bapa on hubani Naibata. Anjaha bani ujung ni tonggo in, husobut ma : “Ham do mangkatahon Jesus, Ahu do parpuhoon ampa hagoluhan, sai na manggoluh do na porsaya Bangku, age pe matei ia, Nimu. Halani ai, age pe itadingkon bapanami on hanami, sai na manggoluh anjaha ilambungMu do ia. Ase ondos hutanganMu ma ia, Amen.”
Piga-piga gabe halongangan pangahapnami ibagas na masa in, al.:
- Ijin dob amen, ibuka hanami panonggornami, tartawa ma bapa on anjaba tartangar do sorani tawa ai. Mandarat ma otik hun pamanganni songon guboh, dob ai soh ma parhosahni. Hudidah ma jam, pukul 07.15 ma ai. Ase sekitar 10 minit hansa ganup na masa in.
- Dob ai bohi ni bapa on borsih tumang. Lang adong be bokas ni ugah i atas ni panonggorni aima bokas ni herves na mangonaisi sebelumni.
- Lang ipaturut Tuhan in hanami lang margogoh. Halani ai ipasalosei lobei hanami mamboiskon serapan ampa inumonnami in. Dob salpu anjaha tenang pe hanami haganup ase borhat bapa nami in.
Dob tartawa bapa on anjaha mandarat guboh ai, tangis ma na si inang. Ahu pe laho ma hu darat manjumpahkon suster, hape sidea pe domma ipintu. Dob ipareksa sidea tongkin, mintor idilo ma dokter. Lang piga dokah roh ma homa dokter. Sanggah na mamareksa dokter in, na hubungi ma hu Jalan Bali (hu rumah), hu Jakarta, hu Medan pakon piga-piga diha-diha na dohor ampa piga-piga pandita patugahkon na masa in. Anjaha mintor marsipatugahan do homa haganup sidea.
Sekitar 07.30 salosei ma pamareksaan ni dokter. Janah halani domma homa don g balos humbani na si abang i Jakarta gambaran ni panguburan, mintor na pindohon ma homa hubani perawat i Rumah Sakit ase iformalin ma bapa on hira-bira tahan ronsi ari Kamis, 2 Desember. Anjaha dob manriah pakon botou Pdt. Vivia ampa inangnami, sidea ma tading tongkin i kamar ai rup pakon perawat sambil paimahon proses selanjutni. Ahu pakon inang mulak ma tongkin hu rumah mangalop pakeian ampa Toga ni bapa on ase ipakeihon dob iformalin.
Pukul 08.00 das ma use hanami i Rumah Sakit. Anjaha jumpah hanami domma i lantai I, i kamar ianan marformalin sonai pakon botounami ampa inangnami. Lang piga dokah roh ma homa nasi adek-adek dob ipaberes sidea sagala naporlu i rumah. Roh ma homa piga-piga diha-diha, al. St. H.R. Girsang pakon inang, Dr. Ronald Saragih pakon inang, lanjar sidea ma homa lobei mangurus sagaia parhiraan i Rumah Sakit.
Sekitar pukul 09.55, salosei ma bangkei ni bapa on iformalin anjaha ipakeihon baju Togani. Pukul 10.00, ipamasuk ma hu Ambulans janah borhat ma hanami hu rumah i Jalan Bali. Inang pakon botou Pdt. Vivia Perpetua ibagas ambulans, au pakon inangnami rup. Sekitar pukul 10.15, das ma hanami i rumah. Anjaha domma torsa haganup jumpah hanami, halani mintor buei do hasoman sahuta ampa Kuria Desa Bane mangurupi adek-adek pakon parboruonnami pabereskon ianan i rumah, sonai ronsi taratak sabagian domma jongjong i alaman pakon kursini.
Songon Parborhatni hu Gareja Sanggan Goluhni, Borhat/Mulak Ia Hubani Bapa na i Surga
Sadokah goluh ni Bapanami on, anggo jumpah ma ari Minggu, anggo lang i Pematangsiantar ia martugas, girah sogod domma marugas ia. Tujuan ni ase boi marbuali atap pajumpah pakon dakdanak Sikolah Minggu lobei i Kuria na itujuni ai. Halani ai, dob salpu mandoding humbani doding Haleluya songon hasomalanni, sip anjaha tenang ma ia merenungkon na sihol ambilanni.
Hansa bani Minggu tanggal 28 Nopember 2004, aima Minggu Advent I (Tahun Baru Kuria), lang dihut be inumonni bapa on ibahen inang, halani modom ope ia. Hanami hansa minum anjaha serapan. Anggo ia tenang tumang songon na modom, anjaha dear do parhosahni. Tapi dob salpu hanami serapan, songon panorang parborhat ni hu Kuria mangidangi sadokah ni on, sonai ma ia borhat. Hansa :
- Lang be hu Kuria na i dunia on, lang be hu Bah Kapul, Simbolon Panel, Merek Raya, atap hu Kuria Tanah Jawa ia barhat. Tapi borhat ma ia mannjumpahkon Tuhanni ampa Tuhannami, Bapani ampa Bapanmi (aima Tuhan Jesus Kristus i Surga na ihasiholini ai.
- Lang be homa mulak ia botarini janah mangindo ase ibahen teh na hangat bani. Halani domma dong malekat ni Naibata na mangidangisi.
Tarpuji ma Tuhanta Jesus Kristus, halani ibalosi do tonggonami, tonggonta haganup, pangindoan ni bapa on, pangindoanni haganup. Anjaha age pe borhat ia, tapi domma torsa haganupan itadingkon termasuk pamasu-masuon ni pahompuni, Dani Jensen Purba, i Tangerang tanggal 27 Nopember ai. Anjaha pukul 07.15 ai, Hamuliaon ni Jahowa na ihasiholini ai, in do tongon siparayakonni. Halani ai ibagas na tenang, ibagas ampa hubani Tuhan Jesus Parpuhoon ampa Hagoluhan in do ia borhat ibagas na tartawa. Anjaha lang be tarononni na sahit i dunia on.
Bab XVI. Acara i Rumah pakon Pemakaman >>
Recent Comments