5. 1985 — 2004: Dob 50 Tahun Marhorja, Pensiun, Torus Ope Mangidangi

1. Juak-Juak ni Naibata Lang Dong Masa Pensiun

Atap na legan pe pemahaman ampa kesan ni hasomanku Pandita ampa Parhorja i GKPS pasal pandangan ampa goluhku bani horja ni Tuhan i Kuria in, boi do hujalo ai. Tapi in ma haporsayaonku. Ilobei ni Naibata “Lang dong na pensiun. Humbani struktur aturan i Kuria maningon do pensiun. Tapi anggo i lobei-lobei-Ni totap do hita gabe juak-juak na maningon torus sirsir manangihon parentah-Ni ampa mangkorjahon horja-Ni anggo ibere ope goluh ampa hajorgiton banta”.

In ma pemahaman ampa na huahapkon. Halani songon pasu-pasu ampa idop ni uhur na huhasiholhon tongtong ibere Naibata bangku, sonai ma homa age horja-Ni wajib do ningon huhorjahon ai ronsi na lang tarbahen ahu be. Ijai pe ahu ase soh.

Sehat tumang ope tingki mandihuti pamasu-masuon ni pahompuni, Dionisius Purba/Agnes br Hutabarat i GKI Tanjung Duren Jakarta Barat 31 Juli 2004 — 4 bulan paima marujung

Domu hubani keyakinan in do homa ase humbani mungkah ni, hurang satuju ahu anggo isobut Pandita, Penginjil aima Pegawai GKPS. Tarlobih anggo isobut pegawai full timer. Ase pergumulan pasal in bangku aima: mabiar ahu, tugas hajuak-juakon ampa parmahan ai gabe margeser, lang pitah bani pemahaman tapi ronsi pelaksanaan. Anjaha anggo Pandita, Penginjil ai ma na full timer, naha nani Sintua, Syamas, Pagori ni Kuria. Boi do nani gabe part timer ia ilobei ni Naibata? Lang porlu be nani ganup hita on atap aha pe horjanta gabe full timer ilobei ni Naibata?

Sadalan hujin ma bani tahun 1985 mamasuki Masa Persiapan Pensiun (MPP) ma ahu. Anjaha 1 Januari 1986 pensiun. Anggo ibilangi gonap 50 tahun ma ahu marhorja i Simalungun ampa i Kuria ni Tuhanta. Aima mamungkah tahun 1936 gabe guru i Harang Gaol. Hansa 1937-1939 sompat lobei sikolah tongkin. Tapi humbani tahun 1939 aktif ma use torus das bani tahun 1986.

Tarpuji ma Tuhan in na mambere sonin dokahni panorang bangku gabe juak-juak-Ni mangidangi Kuria-Ni. Age pe hubotoh do, songon pangakuan ni Apostel Paulus : “Jabolon na so margagan do ahu, sibar horja na patut do hansa huhorjahon” (Lukas 17:10).

2. Tahun 1985 – 2004 Torus Mangidangi hu …>>