1. Marsikolah i Sikolah Zending Haranggaol

Domma hun dokah dong parsikolahan Zending (Volkschool) i Mariah Purba Saribu. Aima na ipajongjong ni Pdt. Guillaume. Domu hujin do homa ase i huta on marianan Evangelis Johanes Panggabean. Tapi halani lang piga na ra marsikolah gabe ipindahkon janah ipasada ma sikolah on hu Tiga Langgiung Haranggaol.

Tabun 1926 (hudingat domma godang ahu panorang ai), roh ma bapa ondi mangajar-ajari ahu ase marsikolah hu sikolah zending (Volkschool) Tiga Langgiung. Mungkahni borat do uhurhu. Halani lang piga hasomanku sapargurou-goroan marsikolah. Tapi halani gatinan do bapa i rumah i Tiga, gabe hubalosi ma.

Halani ai anggo hun Mariah Purba Saribu lang piga hanami. Umum ni hun Tiga Langgiung, Siboro, Haranggaol, hun Nagori ampa Sihalpe. Anggo na tang hudingat sakalasku Kalas 1 janah manggoluh ope homa panorang on aima St. Herdin Purba Siboro (orangtuani St Ir Rusman Purba, MBA, na marujung bani 24 Februari 2007, Ed.). I atas nami Kalas II aima abang Mentar Purba, Bupati Kenan Purba, Jandi Purba, pnl.

Na mangajari hanami i parsikolahan aima Guru Zending na iutus HKBP hun Pearaja, Tarutung. Halani ai marbahasa Toba do sidea mangajari.

Anjaha ganup hanami lape adong na tardidi. Sipajuh begu-begu ope, songon orangtuanami. Tapi age pe sonai, sabar tumang do sidea mangajari hanami. Maila do gan sidea anggo lang pintar-pintar muridni. Iajari ma hanami mambasa, manulis ampa maretong. Iajari do homa kebersihan, budi pekerti, mangkargahon panorang. Tapi dihut do parlajaran agama humbani Bibel pakon mandoding ampa mar-koor.

 >>2. Halak Na Bayak Ampa si Lazarus Na Masombuh