Mangidangi i HKBPS Resort Merek Raya
Sadalan hubani haputusan ni Sinode Bolon Istimewa ampa Majelis Gereja HKBP Simalungun, bani bulan Oktober pindah ma hanami hun Pamatang Raya hu Merek Raya. Malas tumang do uhur ni Kuria Merek Raya manjalo hanami. Anjaha halani lape adong rumah, untuk sementara isewa ma lobei, ai rumah ni Bp Purba, i luan ni rumah ni Gr. Salem Saragih. Lanjar ijai ma hanami marianan. Marhitei na dob gabe sada Resort anjaha adong sahalak Pandita mangidangi i Resort Merek Raya, buei tumang ma horja pangidangion na tarbahen manogu nogu Kuria in. Adong do 7 Kuria na masuk hu Resort on panorang ai : HKBPS Merek Raya, Bah Bulawan, Sigodang, Talun Kahombu, Talun Madear, Raya Bosi, pakon Pargampualan.
Bani piga-piga ianan jongjong do tumpuan na gabe embrio ni sada Kuria i huta ai, deba hunjai: i Sirpang Sigodang, Huta Dolok ampa piga piga ianan na dohor hu Pargampualan.
Itempatkon ma homa sahalak Bibelvrouw (sonari isobut Penginjil Wanita) i Resort Merek Raya aima Biv. Loina br. Sinaga. Ase dong hasomanni hu Kuria-kuria na dohor dohor hun Merek Raya, gati do iarahkon anaknami si Marhaposan na panorang ai domma kalas IV SR – mardalan nahei.
Legan ni horja Sakramen, mangajari Parguru Tardidi, Marguru Doding, Pangarahon, Partonggoan, pnl. lanjar ijajaki do tumpuan bani huta huta na agak daoh humbani Kuria na isobut in ase podas jongjong gabe sada Kuria.
Gareja GKPS Merek Raya dob irenovasi (tahun?). Pandita J Petrus ma na gabe Pandira Resort naparlobei ijon (1952 – 1955), anjaha adong do 7 Kuria na masuk hu Resort on panorang ai : HKBPS Merek Raya, Bah Bulawan, Sigodang, Talun Kahombu, Talun Madear, Raya Bosi, pakon Pargampualan.
Legan ni i Merek Raya, anggo tudu manohu hu Kuria pagaran, borhat ma hanami bani ari Sabtu.
Bodari ni ibahen ma Evangelisasi, parsahap-sahapan, manorih naboritan, pnl. Patarni sogod mangajari Sikolah Minggu, dob ai pe ase Kebaktian Minggu.
Dob salpu Kebaktian Minggu, sipata bodarini iadongkon ope acara na marpardomuan hubani padoraskon pargoluhon ni Kuria in.
Age pe hundaoh do deba Kuria in, tapi buei do Parhorja na sirsir mangkasomani ampa mangurupi ahu marhuta huta, aima, St.Gr. Enos Sinaga, St. Galuh Saragih, St. Gr. Salem Saragih, pnl.
Anggo hu Pargampualan, marlereng ma hanami hun Pamatangsiantar torus hu Gorilla manuju hu Dolog Simbolon. Ongga do tudu sahalak ahu borhat hu Pargampualan. Hape adong acara na manompong i Kuria ai, mambahen lang boi ahu mulak humbani ari Sabtu ronsi ari Rabu. Hape lupa na husuruh patugahkon hu rumah, gabe sompat sosak inangnami i rumah. Gabe borhat ma St. Gr. Enos Sinaga pakon Gr. Rakhmat Sinaga hun Merek mamindahi ahu das hu Pargampualan. Sonin ma bujur ampa setia ni sidea bani horja in, pitah halani goran ni Jesus tumang do ai.
Lang Be Iajarhon Agama i Parsikolahan
Tahun 1952 kaluar ma peraturan Parnarentah pasal pengajaran Agama Kristen lang be masuk Kurikulum Sikolah. lgantih ma ai bani Pelajaran Budi Pekerti. Sada pukulan na borat do on bani Kurianta sonai bani Simalungun panorang ai. Halani marhitei sikolah do salah sada kesempatan laho mambina ampa manambahi panandaion ni niombahta pasal Jesus panorang ai. Halani ai rugi tumang do pangahap bani kebijaksanaan ni pamarentah in.
Domu hujin, na bahen ma homa kebijaksanaan. Dua hali saminggu huolat ma ganup anak sikolah na mulak hun sikolah. Hu suruh ma sidea masuk hu gareja. Ijai ma huajari sidea agama. Malas tumang uhur halani lang adong pala na haboratan. Anjaha age pe tambah do halojaon halani in, tapi mardingat porluni pembinaan haporsayaon ni niombahta, gabe lang na ahabkon lojani ai.
Recent Comments